Според извештајот на собранискиот спикер, најмногу заостанати закони има на Комисијата за образование и наука каде што има десет незавршени точки. По неа следуваат комисиите за здравство, за политички систем и односи меѓу заедниците, за надворешна политика, за надзор над мерките за следење на комуникациите и за финансирање и буџет. Причините за незавршувањето на овие седници, според Џафери, треба да се бараат кај парламентарните групи и нивните координатори
Во годината што изминува, пратениците во законодавниот дом во вкупно 88 дена одржале 39 нови седници и 50 продолженија на седници од минатата година. Ова на денешниот брифинг со новинарите го кажа собранискиот претседател Талат Џафери оценувајќи ја работата на парламентот во 2022 година.
Џафери достави и список на незавршени комисиски расправи за закони и други точки кои се заглавени на овие собраниски тела, поради што тие не можат да бидат поминати на пленумот.
Според извештајот на собранискиот спикер, најмногу заостанати закони има на Комисијата за образование и наука каде има десет незавршени точки. По неа следуваат комисиите за здравство со девет, за политички систем и односи меѓу заедниците, за надворешна политика, за надзор над мерките за следење на комуникациите со по осум точки и за финансирање и буџет со седум закони.
Причините за незавршувањето на овие седници, според Џафери, треба да се бараат кај парламентарните групи и нивните координатори.
Како предизвик во работењето на Собранието оваа година, Џафери ја нагласи активната блокада на пратеничката група на опозициската ВМРО-ДПМНЕ, која, како што рече, довела до нов начин на работата на парламентот.
„Ненавикнати на таа ситуација моравме да се приспособиме кон таа состојба. Од контекст на одлуката, секако, тоа е демократско политичко право на демократски субјект да учествува во политичкиот живот да има политичка одлука како ќе дејствува во Собранието. Од тој аспект тоа не можете да го вреднувате како нешто што е недопустливо или забрането“,
рече Џафери.
Според Џафери, граѓаните треба да одлучат како тие ја доживеале блокадата на опозицијата кога ќе имаат можност да ги споредат, како што рече, сите оние точки што се поминати и се она што е заостанато поради неработење на комисиите. Граѓаните, додаде Џафери, се тие што треба да оценат колку таквите одлуки биле во нивна полза или штета.
„Сум укажувал дека тоа во секој случај не е соодветен одговор“,
рече Џафери.
За обвинувањата од ВМРО-ДПМНЕ за неговата работа дека одредени одлуки не се носени врз основа на Деловникот и од страна на владејачкото мнозинство, тој вели дека сите одлуки се базирани според Деловникот и надлежноста што произлегува од него.
„Во спротивно требаше да го затворам Собранието и да си одам дома односно да не работи. Затоа Деловникот дава можности за надминување на определени ситуации“,
рече тој.
Првата нова седница на Собранието е закажана за 10 јануари.