Неизвесно е дали има 80 гласа за законот за одбрана, поради тоа што некои пратеници се двоумат дали да го поддржат
По изгласувањето на законот за јавно обвинителство со 80 гласа „за“, а на барање на координаторот на пратеничката група на ВМРО-ДПМНЕ, Никола Мицевски, претседателот на Собранието, Талат Џафери, даде еден час пауза.
Мицевски реагираше на повтореното гласање за законот за јавно обвинителство и бараше да се уважи првото кое го поништи Џафери по приговор на некои пратеници дека нивниот глас не бил регистриран. Мицевски рече дека повтореното изјаснување натерало да гласаат „за“ и одредени пратеници што се двоумеле. При првичното гласање, на екранот се појавија 74 гласа „за“.
По враќањето од пауза, Собранието би требало да ја продолжи 135. седница, со изјаснување за измените и дополнувањата на законот за Советот на јавни обвинители. Се очекува овој закон да помине без проблеми, бидејќи за него не е потребно двотретинско мнозинство.
Потоа, би требало да започне продолжението на 123. седница, на чиј дневен ред е законот за одбрана кој се носи со најмалку 80 гласа. Според извори од мнозинството, во тек се консултации за да се утврди дали има толкав број пратеници што би гласале за овој закон, зашто дел од нив се двоумеле како да постапат.
*поврзана вест ВМРО-ДПМНЕ гласаше за „Северна“ во Законот за служба во Армијата, но ѝ пречи во Законот за одбрана
По ова, спикерот Џафери ја има закажано 137. седница со единствена точка на дневниот ред – предлог-одлука за распуштање на Собранието. Според политичкиот договор меѓу релевантните политички партии, на 12 април треба да се одржат предвремени парламентарни избори.