Измените и дополнувањата на Законот за здравствена заштита сега ќе бидат испратени на усвојување во Собранието по скратена постапка
Владата даде зелено светло за измените и дополнувањата на Законот за здравствена заштита со кои Министерството за здравство добива дополнителни овластувања во услови на кризна состојба прогласена заради заштита на јавното здравје и прогласена епидемија или пандемија на заразна болест.
Конкретно, тоа значи дека на Владата законски и се овозможува да ги определи највисоките цени во приватните болници, во висина на референтните цени утврдени од страна на Фондот за здравствено осигурување со цел да се овозможи овие услуги да бидат подеднакво економски достапни за сите граѓани.
Со измените, исто така, е предвидено и користење на ресурсите на приватните болници доколку е тоа потребно за заштита на јавното здравје и се забранува преземањето на здравствените работници од јавното здравство од страна на приватните здравствени компании.
Предвидени се и измени во делот на глобите за прекршоци доколку приватните здравствени установи не постапуваат согласно законските одредби.
Измените и дополнувањата на Законот за здравствена заштита сега ќе бидат испратени на усвојување во Собранието по скратена постапка.
Министерот за здравство Венко Филипче минатата недела разговараше со приватните болници за намалуввање на цените, по апелот од јавноста. Но тогаш „Систина“ се изјаснија дека економски им е неисплатливо да ги намалат цените, додека од „Жан Митрев“ соопштија дека се подготвени да ги намалат цените за 10 отсто.