Прашан за каков конкретно дисбаланс во меѓуетничните односи зборува, Гаши потенцира дека говори за дисбаланс во кој би се креирала перцепција оти сите поголеми партии од албанскиот блок се со СДСМ и дека СДСМ е заложник на Албанците
Откако обелодени дека неговата партија ја напушта владината коалиција и ќе дејствува како опозиција, лидерот на Алтернатива, Африм Гаши, порача дека одлуките што ги носи владејачкиот СДСМ ќе доведат до дисбаланс и зголемени меѓуетнички тензии.
„Јас се плашам дека со ова што го прави СДСМ се загрозени европските перспективи и со ваквите потези ќе се произведе и дисбаланс во меѓуетничките односи. Така ќе растат и некои радикални партии кои се против европските интеграции и затоа мислам дека е многу непромислено и е многу ризичен потег за евроинтеграциите“,
порача Гаши на прес-конференцијата на која обелодени дека Алтернатива нема веќе да биде дел од владејачкото мнозинство.
Прашан за каков конкретно дисбаланс во меѓуетничните односи зборува, Гаши потенцира дека говори за дисбаланс во кој би се креирала перцепција оти сите поголеми партии од албанскиот блок се со СДСМ и дека СДСМ е заложник на Албанците.
„Мислам дека тоа ќе придизвика меѓунационални недобри односи меѓу овие два етникуми. Така, некои политички партии кои се радикални во однос на меѓуетничките односи ќе влезат во Собранието многу посилни и ќе предизвикаат проблеми. Најважно за нас е што партиите можат ова да го злоупотребат и да го стопираат европскиот процес“,
додаде Гаши.
Лидерот на Алтернатива додаде дека досега сите заедно работеле на релаксација на меѓуетничките односи, но ваквите одлуки, како што рече, очекува да предизвикаат тензични меѓуетнички односи, особено меѓу Албанците и Македонците.
„Иднината ќе биде сведок дали ние сме биле во право или тие“,
рече Гаши.
Алтернатива денеска на состанок на Централното собрание на партијата во Тетово одлучи да ја напушти владината коалиција и нејзините тројца пратеници во Собранието да дејствуваат како опозиција.