Иако ова не се однесува директно на Западен Балкан, очигледно е дека едно од местата каде што новиот механизам би можел да се применува е токму балканскиот регион
Со новата германска влада, која деновиве ќе започне со работа, Франција во европските институции доби важен партнер за промени на надворешната европска политика.
Претпоставките се дека и тој нов политички пат ќе има големо влијание и врз Западен Балкан.
Франција и додека Меркел беше канцеларка се обидуваше да најде начин да се поедностави надворешната политика на ЕУ, односно за надворешно политичките одлуки во Советот на ЕУ во иднина за нив да биде потребно просто мнозинство, а не консензус, како што е случај сега, но Меркел не ја прифати оваа идеја.
Новата влада, која ќе ја предводи социјалдемократот Олаф Шолц, всушност е многу поблиску до француските ставови. Како што пишува „Политико“, веќе овие денови би можел да се појави предлог со кој ќе се поедностават некои надворешнополитички одлуки, како носењето на санкции.
Според актуелните правила, за одлука за санкции потребен е консензус, додека, ако помине новиот предлог, за тоа ќе биде доволно само просто мнозинство.
Во наредните месеци може да се очекуваат и предлози за тоа на кој начин ќе се одлучува со просто мнозинство и во останатите области од надворешната политика, а тоа е нешто што Франција досега го заговараше заедно со уште неколку влијателни земји на ЕУ, но сега кога би ја имала поддршката од Германија, се претпоставува дека ќе биде полесно.
Како што пишува „Политико“, првенствената цел на овој нов предлог е да се засили влијанието на ЕУ во глобалните односи за полесно да се позиционира во однос на останатите глобални сили, како Кина, САД и Русија. Во однос на тоа дека ниту една земја на ЕУ сама не може да блокира ниту една надворешнополитичка одлука, тоа ќе значи силно влијание на Брисел и брзо носење на одлуките.
Иако ова не се однесува директно на западен Балкан, очигледно е дека едно од местата каде новиот механизам би можел да се применува е токму балканскиот регион.
„Една глобална моќ која ја поседува ЕУ е нејзината економска сила, но комисијата не може ова средство да го користи во надворешната политика поради правилата за вето кога се во прашање санкции и надворешна политика. Дури и во ситуации кога сите земји на ЕУ ќе се усогласат за воведување на санкции, на пример против Русија, поединечни влади на ЕУ често ја користат моќта за вето, со цел да ги осигурат отстапките во некои други области или да ја поништат самата одлука“,
пишува „Политико“.
Европските аналитичари токму новата Влада на Германија ја гледаат како појдовна точка за промени во ЕУ, токму во однос на тоа на кој начин ќе се донесуваат надворешнополитичките одлуки во иднина.