Преку конструктивни разговори со Бугарија, сите отворени прашања ќе се надминат пријателски и Бугарија ќе остане силен поддржувач на С Македонија како дел од Европската Унија, истакнал лидерот на ДУИ, Али Ахмети, при неговата денешна средба со шефот на мисијата на ОБСЕ во Скопје, амбасадорот Клеменс Која.
Ахмети го информирал Која и за функционалноста на коалицијата и Собранието и дека функционира според сите принципи што ја водат земјата кон Европската Унија.
Како што соопшти ДУИ, за време на оваа средба, Ахмети и Која разговарале и за предизвиците со пандемијата предизвикана од ковид-19, за најдобрите начини за справување со оваа состојба, за економската поддршка и помошта за компаниите и граѓаните преку мерки што придонесуваат за полесно надминување на последиците предизвикани од корона-кризата.
Ахмети му порачал на амбасадорот Која дека соработката на земјата со Мисијата на ОБСЕ е од голема важност, особено во делот на користењето на искуствата и експертизата што ги добиваме во повеќе области.
За време на средбата лидерот на ДУИ и шефот на мисијата на ОБСЕ во земјата разговарале и за регионот и ситуацијата создадена по поднесувањето на обвиненија од Специјалниот суд против претседателот на Косово, претседателот на парламентот на Косово и неколку други поранешни водачи на Ослободителната војска на Косово (ОВК).
„Ахмети му повтори на амбасадорот Која дека војната на ОВК беше војна за слобода, праведна и дека и последните обвинети ќе се вратат со бел образ од Хаг и конечно ќе ја докажат чистата војна што ја водеше Косово и нејзиниот народ“,
се наведува во партиското соопштение.