Министерот за надворешни работи и надворешна политика, Тимчо Муцунски, во своето обраќање ја истакна важноста од паметењето на трагичните настани од Холокаустот и оддаде почит на жртвите, особено на македонските Евреи кои во 1943 година беа депортирани во Треблинка
Со изложбата „Аушвиц – место на Земјата: Албум со фотографии од Аушвиц“ од Јад Вашем – Светски центар за сеќавање на Холокаустот во Израел, во Министерството за надворешни работи (МНР) денеска е одбележан 27 јануари, Меѓународниот ден на сеќавање на жртвите на Холокаустот.
Фотографиите од изложбата од германскиот нацистички концентрационен логор „Аушвиц“ во окупирана Полска, кој беше ослободен на 27 јануари 1945 година од советската војска, се единствена досега позната визуелна документација за процесот на собирање и селектирање на Евреите кои биле депортирани во Биркенау.
Од околу 1,3 милиони луѓе испратени во логорот, повеќе од 1,1 милион беа убиени, повеќето од нив Евреи, но и Полјаци, Роми и Синти, советски воени затвореници и други што беа цел на елиминација во расната идеологија на Адолф Хитлер.
Министерот за надворешни работи и надворешна политика Тимчо Муцунски во своето обраќање ја истакна важноста од паметењето на трагичните настани од Холокаустот и оддаде почит на жртвите, особено на македонските Евреи кои во 1943 година беа депортирани во Треблинка.
Претседателката Гордана Сиљановска-Давкова денеска присуствува на одбележувањето на 80-годишнината од ослободувањето на логорот Аушвиц-Биркенау, во предградието на Ошвјенќим, близу Краков. Комеморацијата се одржува во Меморијалниот центар и музеј „Аушвиц-Биркенау“ со присуство на педесетина државни делегации од целиот свет.