Началникот на Секторот за внатрешни работи (СВР) од Скопје, Ристо Ставревски, назначен по предлог на министерот Наќе Чулев, на денешната прес конференција информираше дека МВР ја затворило истрагата за случајот „теретана“ поврзан со претседателот на ВМРО-ДПМНЕ, Христијан Мицкоски, и дека доказите кои ги прибрале се разликуваат од перцепцијата која била создадена во јавноста.
Случајот сега е во рацете на скопското обвинителство.
„Комплетниот материјал е доставен до Основното јавно обвинителство кое треба да даде повеќе информации за доказниот материјал. Со оглед на фактот дека случајот со фитнес-центарот ‘Синерџи’, доби голем публицитет во јавноста МВР во соработка со надлежното обвинителство ги обезбеди сите материјали за негово расчистување. Обезбедени се сите изјави на инволвираните, хард дисковите, изработивме фото албуми, извршивме анализа и употребивме компаративен медот за споредбеност од тоа што беше објавено и од тоа што од наша страна беше обезбедено како такво, и останати материјали со цел да ги расветлиме сите дилеми што во јавноста се наметнаа околу овој случај. Од сите преземени мерки во соработка со надлежен јавен обвинител од ОЈО Скопје, може само да изнесеме дека постои разлика од тоа што беше презентирано во јавноста и тоа што беше обезбедено во предистражната постапка“,
рече началникот Ристевски.
Истовремено тој додаде дека е обезбеден и еден дополнител клучен доказ кој исто така потврдува дека е различна перцепцијата која се создаде во јавноста, но заради тајноста на доказот истиот не може да се објави.
И министерот за внатрешни работи од ВМРО-ДПМНЕ, Наќе Чулев, тврдеше дека ситуацијата е различна од тоа што било презентирано во јавноста наведувајќи дека снимката која се појави на интернет е од октомври 2019.
Од друга страна, пак, дополнителната заменик-министерка, Славјанка Петровска, тврдеше дека Мицкоски сакал да влијае за случајот и се јавувал кај вработени во МВР.
*Поврзани вести:
Се појави нова снимка од Мицкоски во теретана, тој тврди дека е стара најмалку 6 месеци
Чулев: Снимката со Мицкоски во теретана е од октомври 2019 г.