Словенечката компанија „Растодер“ тврди дека била цел на злоупотреба од страна на криминален картел, по објавата за заплена на еден килограм кокаин во скопското село Крушопек, скриен во пратка со банани од марката „Дерби“ – бренд чиј сопственик е оваа фирма.
Словенечките медиуми, како што пренесува МИА, посочуваат дека кокаинот бил скриен меѓу банани увезени од Јужна Америка, чија крајна цел била Италија, но транзитирале преку неколку балкански земји. Агенцијата СТА наведува дека пратката со банани од Јужна Америка со брод стигнала во Црна Гора, од каде што потоа дел бил пренесени во Албанија и Северна Македонија, додавајќи дека крајна цел на откриената дрога во Крушопек бил наркопазарот во земјава.
Компанијата „Растодер“, во својата реакција, истакнува дека уапсените од страна на македонската полиција во врска со овој случај не се поврзани со неа.
„Полициската истрага не го таргетира ‘Растодер’“, се наведува во соопштението на словенечката компанија, при што се додава дека меѓународни криминални организации очигледно ги злоупотребуваат трговските рути од Јужна Америка за своите противзаконски активности.
Компанијата оценува дека и таа била една од многуте фирми за трговија со овошје и зеленчук што се злоупотребени од страна на шверцерите на наркотици.
„Убедени сме дека станува збор за системска злоупотреба која од неодамна е сè почеста и со која се соочуваат сите водечки меѓународни корпорации, увозници и логистички системи. Дури и проблематичната македонска пратка ги помина сите безбедносни контроли, последната во пристаништето Бар во Црна Гора“,
се истакнува во соопштението на „Растодер“.
Словенечките медиуми наведуваат дека искористувањето на пратките со стоки од Јужна Америка кон Европа за шверц на дрога не е невообичаена појава, посочувајќи дека само во текот на оваа година во одвоени акции во Данска, Костарика, Еквадор, Бугарија и сега во земјава се запленети над два тона наркотици.
Во акцијата на македонската полиција во Крушопек, при која беше запленет кокаинот, беа приведени четири лица. По заплената полицијата отвори истрага за правното лице во чии простории беше пронајдена дрогата, како и за евентуална вмешаност на други физички и правни лица во случајот.