Предлозите за олеснување на мерките за движење на населението, како и дополнителните мерки за заштита, како носење заштитна опрема, Владата ќе ги разгледува утре на седница, на предлог на Комисијата за заразни болести, посочува државната агенција МИА, повикувајќи се на изјава од Владата.
„И Владата и премиерот уште во текот на викендот најавија воведување меки мерки со цел олеснување на рестрикциите. Барањето и конкретниот предлог за скратување на полицискиот час дојдоа од Комисијата за заразни болести, а истите беа презентирани утрово на главниот кризен штаб од страна на министерот Филипче. Никој од членовите на Штабот не беше против“,
велат од Владата.
Дел од измените за движењето на граѓаните кои Комисијата за заразни болести ги предложила до Владата се полицискиот час во работните денови да започнува од 19 часот, а за викендите од 13 часот во сабота и да трае до 5 часот наутро во понеделник.
Нив на денешната прес-конференција ги презентираше министерот Венко Филипче.