Паралелно, од грчката опозиција од тамошната влада бараат „веднаш да го интернационализира прашањето со тоа што новото раководство на Северна Македонија ќе биде соочено со своите одговорности пред меѓународната заедница од моментот кога ќе продолжи да го прекршува Договорот“.
Грчката опозициска партија Сириза денеска го осуди, како што соопшти, новото прекршување на Договорот од Преспа од страна на претседателот на ВМРО-ДПМНЕ и мандатар за премиер на Република Северна Македонија Христијан Мицкоски и ја повика грчаката влада на чело со Кирјакос Мицотакис „конечно да ги преземе предвидените дејствија“ јави државната агенција МИА.
„Сакаме да го потсетиме ВМРО-ДПМНЕ дека континуираните прекршувања на Договорот од Преспа носат и предвидени санкции. Целосното усогласување со Договорот е неопходен услов за членство на Северна Македонија во ЕУ“,
се наведува во соопштението на Сириза.
Паралелно, од грчката опозиција од тамошната влада бараат „веднаш да го интернационализира прашањето со тоа што новото раководство на Северна Македонија ќе биде соочено со своите одговорности пред меѓународната заедница од моментот кога ќе продолжи да го прекршува Договорот“.
„Навистина е жален фактот што Нова демократија и ВМРО, двете сестрински партии во ЕПП, се обидуваат, за да привлечат националистичка публика, да го торпедираат Договорот кој е пресвртница за сите народи на Балканот. Владата на Нова Демократија сноси тешка одговорност за оваа нова штета што ја нанесува на националните интереси, во име на својата неодговорна надворешна политика, избегнувајќи сите овие години какво било активно вклучување во Договорот за да ги одржи внатрепартиските рамнотежи“,
стои во соопштението на Сириза.
Во Собранието денеска почна дебатата за избор на новата влада која ќе ја предводи лидерот на ВМРО-ДПМНЕ Христијан Мицкоски. Мицкоски во своето обраќање пред пратениците државата ја нарекува Македонија.
Според собранискиот Деловник, предвидено е седницата да трае најмногу два дена, односно треба да заврши најдоцна до утре на полноќ. Владата ќе биде избрана ако за неа гласаат мнозинството од вкупниот број пратеници.
Парламентарното мнозинство, кое се очекува да ја поддржи новата влада во Законодавниот дом, брои 78 пратеници – 58 од коалицијата на ВМРО-ДПМНЕ, 14 од коалицијата „Вреди“ и шестмина пратеници од ЗНАМ.
Мицкоски неодамна изјваи дека заклетвата како премиер ќе ја даде со уставното име на државата.
„Заклетвата како нов премиер ќе ја дадам со уставното име на државата, тоа е јасно. Во моите настапи во странство ќе го користам уставното име на државата со придавката. Не можеме да се однесуваме со двојни стандарди, не можеме да бараме од граѓаните да ги почитуваат законите и уставот, а ние да не ги почитуваме. Но, во моите настапи дома и во давањето изјави ќе го користам името на мојата држава, а тоа е Македонија“,
изјави Мицкоски.
Ваквата негова изјава ја поздрави американската амбасадорка во земјава Анџела Агелер. Таа во интервју за „360 степени“ рече дека е воодушевена и ја поздрави најавата на Мицкоски дека в недела, при заклетвата како нов премиер, а и во настапите во странство, ќе го користи уставното име на земјава. Таа не сакаше да зборува за ставот на Грција, чиј премиер Кирјакос Мицотакис изјави дека Договорот од Преспа предвидува едно име за севкупна употреба, а не двојна формула, коментирајќи го ставот на Мицкоски дека дома ќе продолжи земјава да ја нарекува Македонија.