До 23 септември ДИК треба да организира ждребување за да се знае кои кандидати под кои реден број ќе бидат на гласачкото ливче
Синоќа на полноќ истече рокот до кој Општинските изборни комисии (ОИК) официјално требаше да ги потврдат сите листи на кандидати за градоначалници и членови на општинските совети и Советот на Град Скопје поднесени од политичките партии, коалициите и групи граѓани за учество на локалните избори закажани за 17 октомври.
Потврдените листи, ОИК ги доставува до Државната изборна комисија (ДИК) која, пак, најдоцна до 23 септември треба да изврши ждребување за нивниот редослед на гласачките ливчиња. Кандидатите за градоначалници и листите за советници на една партија или коалиција добиваат ист реден број во сите општини. По извршениот ждреб потврдените кандидатски листите ќе бидат објавени на веб-страницата на ДИК и огласени од страна на избирачките одбори.
Исто така, најдоцна од 23 септември, е предвидено овластените претставници на сите политички партии, односно подносителите на листи на кандидати за локалните избори да потпишат Кодекс за фер и демократски избори, во организација на ДИК, а во соработка со Националниот демократски институт.