Доколку во рок од пет дена не се одржи средба, синдикалното раководство на Македонска пошта најави дека ќе ги преземе сите законски мерки и механизми за заштита на правата на работниците со организација на протести и штрајкови
Синдикатот на Македонска пошта бара итна средба со Владата и со Министерството за транспорт и врски за состојбите во претпријатието кое, како што велат, се соочува со загуби во работењето и ризици за редовна исплата на платата.
Доколку во рок од пет дена не се одржи средба, синдикалното раководство најави дека ќе ги преземе сите законски мерки и механизми за заштита на правата на работниците со организација на протести и штрајкови.
„Се надеваме дека пред се Владата, како сопственик на Македонска пошта, ќе ги прифати нашите барања и веќе да се заложиме сите заедно да ги почнеме тие реформи кои се пред се во интерес на граѓаните“,
рече Боро Велигденов, претседател на Синдикатот на денешната прес конференција.
Тој апелираше генералниот директор на Македонска пошта да го стопира огласот за 31 ново вработување во администрацијата на претпријатието, што сметаат дека е економски неиздржано и во постојните финансискси услови.
„Стравуваме како вработени за натамошната иднина на друштвото, како и редовната исплата на плата за наредниот период со оглед на фактот дека платата за јануари ја земавме на 17-ти месецов по истекот на законскиот рок. И покрај тоа што Македонска пошта се соочува со сериозни проблеми со целокупното работење, како и финансиската состојба, генералниот директор распиша оглас за нови 31 вработување во администрацијата. Тие вработувања во оваа ситуација се непотребни со оглед на фактот дека во тој дел имаме превработеност, а тоа може да се направи со прераспоредување на работни места со цел поголема продуктивност, зголемување на квалитетот на работењето и подобри услуги кон граѓаните“,
додаде Велигденов посочувајќи дека нови вработувања се потребни во технолошкиот процес, односно на поштари, шалтерски и работници во оператива, каде немаат доволно кадар.
Тој нагласува дека Македонска пошта генерираа намалени приходи, работи со загуба и затоа стравуваат како ќе се обезбедат средства за редовна плата за наредниот период, посочувајќи дека според негови информации платата за јануари била исплатена со помош на заем земен од Халк банка.
Според Велигденов, не е преземено ништо за спроведување на трипартитниот меморандум за соработка потпишан протестот во октомври лани, што го организираше Синдикатот. Тогаш со раководството и Владата беа договорени активности за внатрешни реформи, со нова систематизација и реорганизација на работењето особено во делот на обезбедување услови и средства за работа, како и потпишување колективен договор.
Во Македонска пошта, информира Велигденов, моментно работат над 2 000 вработени, а вкупната бројка во последните пет години се намалува и претходно изнесуваше 2 200. Проблемот, вели тој, е старосната структура, 65 отсто се над 55 години и заминуваат во пензија, а над 90 отсто од нив се во технолошкиот процес каде што има сериозни проблеми во работењето.
„Наместо да се сконцентрираме да ги подобриме услугите, да обезбедиме поквалитетна работа, преземаме непотребни чекори со новите вработувања“,
додаде тој.