Според Агенцијата за управување со одземен имот, со продажбата на овие недвижности во буџетот на државата ќе се уплатат средства во висина два милиони евра
Агенцијата за управување со одземен имот објави оглас за продажба на два плаца на Водно, претходно конфискуван имот од поранешниот директор на УБК, Сашо Мијалков, во случајот „Империја“.
„Станува збор за градежно неизградено земјиште со површина од 3 880,15м2 и шума со површина од 634,38м2, кои се наоѓаат на место викано Големо Курило на КО Центар 2, одземени со правосилна пресуда I KOK-ПП.бр.283/2022 од Основен кривичен суд Скопје“,
велат од Агенцијата.
Оттаму велат дека со продажбата на овие недвижности во буџетот на државата ќе се уплатат средства во висина од 126 638 882 денари или 2 059 000 евра.
„Со денешната објава за продажба на недвижен имот од страна на Агенцијата за управување со одземен имот, а со претходно донесена Одлука од страна на Владата на Република Северна Македонија, продолжува враќањето на паричните средства во буџетот на државата од одземениот имот на поранешниот директор на УБК, Сашо Мијалков“,
соопштуваат од Агенцијата.
Право на учество на јавното наддавање по електронски пат имаат сите физички и правни лица, освен осуденото лице од кого е конфискувана недвижноста, вработените лица во Агенцијата за управување со одземен имот, како и друго лице кое службено учествувало во постапката за продажба.
Пред помалку од еден месец се одржа аукција на три стана и гаражата на улицата „Славејко Арсов“ во елитната скопска населба Водно.
На лицитација во август, како дел од одземен имот на Мијалков, беа два стана во Охрид, плац на Кожуф, земјиште во Морани, Општина Студеничани, крај Скопје.
Во јули годинава на аукција на берза беа ставени и запленети акции на Мијалков.
Инаку, случајот „Империја“ го отвори поранешното Специјално јавно обвинителство уште во 2018 година, за злосторничко здружување, оштетување или повластување на доверители, злоупотреба на службената положба и овластување, измама и перење пари и други приноси од казниво дело.
Мијалков во „Империја“ призна вина и се спогоди со Обвинителството, а казната беше три години затвор и одземање имот вреден околу 30 милиони евра, меѓу кои 25 стана и парцелата до хотелот „Мериот“.