Основното јавно обвинителство Штип денеска побара на седум лица да им биде изречена парична казна од по 2 000 евра за непочитување на полицискиот час и 3 000 евра за едно лице, грчки државјанин, со живеалиште во Штип, кое не ја почитувало наредбата за самоизолација, сите казниви по член 206 од КЗ за непостапување според здравствени прописи во време на епидемија.
Како што соопшти Јавното обвинителство, седуммина обвинети постапиле спротивно на Одлуката на Владата на Република Северна Македонија за забрана и посебен режим на движење на населението од 21 до 5 часот и во време на забрана на движењето во вечерните часови се движеле пеш или со возила низ градот.
Еден од нив, државјанин на Грција со привремено живеалиште во Штип, требало да биде во задолжителна самоизолација согласно донесените мерки за сузбивање на заразната болест – коид-19. Тој во земјава влегол на Меѓународниот аеродром „Скопје“ на 17 март годинава, при што потпишал изјава за самоизолација која требало да ја почитува во следните 14 дена. Но, во периодот од 17 до 19 март, обвинетиот го напуштил своето престојувалиште и бил во неговата канцеларија во градот.
