Претходно Санчез рече дека Шпанија има намера да ја признае независната држава Палестина до јули и дека наскоро може да се создаде критична маса во ЕУ за тоа да го сторат и другите земји
Шпанскиот социјалистички премиер Педро Санчез, кој собира поддршка ширум Европа за признавањето на палестинската независност, ги освои Ирска и Норвешка, но не и Португалија откако конзервативците дојдоа на власт таму, објави шпанската јавна телевизија ТВЕ.
Претходно Санчез рече дека Шпанија има намера да ја признае независната држава Палестина до јули и дека наскоро може да се создаде критична маса во ЕУ за тоа да го сторат и другите земји.
„Она што се случи викендов потврдува дека она што го заговараме со месеци е неопходно“,
рече Санчез вчера на прес-конференцијата на која присуствуваше и новиот португалски премиер Луис Монтенегро.
Во саботата вечерта Иран го нападна Израел со беспилотни летала како одговор на ракетниот напад врз иранскиот конзулат во Сирија.
„Сега има два пата пред нас. Едниот води кон ескалација на војната, а другиот води кон прекин на огнот на сите страни. Од почетокот на оваа криза, Шпанија се залага за мировен процес со решение за две држави, а со тоа и за заемно признавање на Палестина и Израел“,
рече Санчез.
На Шпанија во идејата ѝ се придружија Ирска и Норвешка, кои Санчез ги посети во петокот, но новоизбраната влада на Португалија остана воздржана.
„Единствено решение за мир“
„Не сум толку далеку од признавањето на Палестина, но верувам дека решението за две држави треба да се усвои во мултилатерално опкружување“,
рече Монтенегро.
Тој објасни дека ЕУ треба да донесе заедничка одлука за ова. Сепак, тој ја поддржа шпанската иницијатива за прекин на огнот и влез на хуманитарна помош во Појасот Газа.
Санчез истакна дека меѓународната заедница веќе доцни со спроведувањето на решението за две држави, кое претходно беше предложено од ОН во границите од 1967 година.
„На Палестинците не може да им се помогне ако не се признае нивното постоење“,
рече тој.
Според Санчез, признавањето на Палестина, која ќе живее во мир со Израел, е „единствениот начин за мирен соживот на Израелците и Палестинците“.