Скопскиот градоначалник Петре Шилегов поднел барање до Општина Центар да му ја предаде сопственоста на спомениците од проектот „Скопје 2014“ на Град Скопје, за да може да почне со нивно дислоцирање.
„Побарав од Општина Центар, покрај одржувањето, да ја предаде и сопственоста за ние потоа да можеме да влеземе во процес на дислокација на дел од спомениците од ‘Скопје 2014’. Барањето е поднесено, имајќи предвид дека станува збор за предизборие, ги испитуваме законските можности дали можат советите на Општината и на Градот да донесат такви одлуки, односно да прифатат таква обврска. Меѓутоа, еве ги изборите, за еден месец ќе поминат, тоа ќе го реализираме во секој случај“,
рече Шилегов.
Тој денеска повтори дека одржувањето на спомениците е на грбот на градските власти и годишно чини околу 500 000 евра, како и дека смета оти проектот „Скопје 2014“ е неприфатлив затоа што е „ментална контаминација на скопјани“, пред сè на младите генерации, бидејќи Скопје никогаш ниту било ваково ниту имало таква традиција.