Градоначалникот на Град Скопје, Петре Шилегов предлага на општините во Град Скопје да им се одземе надлежноста за нспекција на градби и тоа да се додели на Градот. Така, според него ќе се елиминираат субјективните слабости кои можеби постојат кај определени службеници во општините за толерирање на дивоградбите.
„Општините да се занимаваат со урбанизам и со издавање на градежни дозволи, но инспекторирањето и санкционирањето на дивоградби да биде надлежност на Градот. За жал, ние како Град Скопје немаме градежна инспекција и ниту имаме надлежност да санкционираме дивоградби како што е Матка, Мавровка, објектот спроти Американската амбасада… За жал не постои закон врз основа на кој Градот може да делува“, рече Шилегов, во интервју за ТВ Сител.
Најнов од серијата случаи кога инстутуциите не можеа да најдат решение за интервенција кај дивоградба е случајот со објектот кај „Фонтана“ чие уривање е во тек. Него го извршува „Македонија пат“ со одлука на Владата, откако никој не се јави за негово уривање на двата јавни повици на општината Чаир во чија надлежност е објектот.
Претходно, институциите се судрија и околу платформите на Матка.
Во јуни, Основното јавно обвинителство Скопје ја отфрли кривичната пријава против градоначалникот на Општина Сарај Блерим Беџети за злоупотреба на службената положба и овластување.
Иницијативата за кривично гонење ДКСК ја поднесе против градоначалникот Блерим Беџети поради сомненија дека свесно и намерно не презел дејствија и не донел конкретни управни акти во постапките за утврдување на правниот статус на бесправно изградени објекти. Со тоа, како што се посочува, на физички и правни лица им овозможил бесправно да изградат деловни објекти од локално значење и времени објекти – платформи на езерото Матка, да стопанисуваат со нив и да остваруваат противправна имотна корист за себе и за друг.