Шефот на хрватската полиција, Никола Милина, изјави дека починатите се пет лица кои престојувале во домот за стари лица и една вработена
Бројот на починати во масакрот што денеска се случи во домот за стари и изнемоштени лица во хрватски Дарувар се искачи на шест, откако едно лице им подлегна на повредите во болница. Пет лица починаа на самото место.
Шефот на хрватската полиција, Никола Милина, изјави дека се работи за пет лица кои престојувале во домот за стари лица и една вработена. Осомничениот напаѓач побегнал од местото, но полицијата набрзо го фатила во кафуле во близина на објектот.
Полициски претставници соопштија дека напаѓачот користел нерегистрирано оружје.
За нападот реагираа хрватскиот премиер Андреј Пленковиќ и претседателот на Хрватска, Зоран Милановиќ.
Пленковиќ изрази сочувство до семејствата на жртвите и повика да се утврдат околностите за масакрот.
„Згрозени сме од убиството во Домот за стари лица во Дарувар. Изразуваме сочувство до семејствата на загинатите и се надеваме на оздравување на ранетите. Очекувам надлежните органи да ги утврдат сите околности на страшното злосторство“,
стои во пораката на хрватскиот премиер.
Денешниот масакр во домот за стари лица, според хрватскиот претседател Милановиќ, е предупредување и последен повик до сите надлежни институции да направат повеќе за насилството да се спречи, а и дополнително да се воведе поригорозна контрола за поседувањето оружје.
„Очекувам полицијата и државниот правобранител да спроведат брза и темелна истрага за тоа како ќе се утврдат сите околности за ова кривично дело и одговорните ќе бидат казнети“,
порача хрватскиот претседател.
Хрватските медиуми објавија дека осомничениот е роден 1973 година и е поранешен хрватски бранител.