Министерката за одбрана, Радмила Шекеринска, денеска беше со припадниците на Армијата активирани во справувањето со пожарите кај Кокино, соопшти Министерството за одбрана.
„Армијата и овој пат покажа дека не си ја бира задачата, туку се вклучува и помага буквално таму каде што е најтешко, таму каде што е најкомплицирано и каде што ризикот е навистина голем. Повеќе од илјада припадници на Армијата се во подготвеност да се вклучат таму каде што е потребно. Нашата цел е да ги помогнеме напорите од воздух, но и да помогнеме сериозно на терен каде се води главната битка“,
рече министерката.
Шеќеринска порача дека и соседството, земјите од регионот, но и сојузниците се понудија да дадат своја помош во решавањето на состојбите со пожарите во земјава.
„Навистина ми е драго што во раните утрински часови, некои од моите колеги многу брзо реагираа позитивно и после оние први најави за помош кои што дојдоа од Србија и Бугарија, сега веќе имаме ист одговор и од страна на Словенија, што покажува дека како соседи, дека како регион можеме да си помогнеме во вакви ситуации само ако заедно реагираме. Ова покажува исто така голема солидарност и од страна на нашите соседи и од страна на нашите сојузници. Ова е зло и оваа огнена стихија го обедини целиот Балкан“,
рече таа.
Армијата на Република Северна Македонија е распоредена на 13 локации, каде во координација со Центарот за управување со кризи, Дирекцијата за заштита и спасување и со противпожарните бригади се справува со огнените стихии, информираше генералот Бесник Емини, командант на Командата за операции.
Командантот на воздухопловниот ВИНГ, полковникот Стојко Пејовски, рече дека армиските воздухоплови утрово беа ангажирани за гаснење кај Кочани, а попладнето хеликоптер е упатен кај Кокино и дека состојбата будно се следи.
Командантот на првата пешадиска бригада, полковникот Лафчиски, рече дека 60-тина припадници на Армијата се во атарот на реонот Кокино, каде првенствено се грижат за заштита на населените места. Состојбата е стабилна, но во случај на разгорување Армијата веднаш ќе реагира, рече тој.