Министерката за одбрана, Радмила Шекеринска, денеска оцени дека опозициската ВМРО-ДПМНЕ дека се обидува повторно да го одложи пописот со нејзиното барање да се набават 10 000 терминали за земање отпечатоци на прсти кои би се користеле при попишувањето.
„Кога една партија неколку месеци пред пописот што сите го чекаме речиси 20 години, ќе ви даде предлог да се купат илјадници апарати за чија набавка не само што требаат пари, туку треба и долг временски период, тоа практично ви покажува дека опозициската партија повторно не сака да има попис. Тоа е истата партија која еднаш тргна во попис, самата ги рушеше правилата на попис, потроши 4 или 7 милиони евра и потоа рече ’пу пу не важи‘. Оваа држава не може веќе ништо да планира и не може да личи на сериозна држава ако уште еднаш го одлага пописот. И овој предлог на ВМРО-ДПМНЕ е само уште еден обид да се одлага пописот“,
рече Шекеринска.
Таа ја обвини опозицијата за лицемерие, но и за неодговорност бидејќи смета дека е неодговорно да нема податоци за тоа какви економски, социјални, демографски проблеми и потреби има државата.
Од Владата, пак, денеска рекоа дека го разгледуваат таквиот предлог на ВМРО-ДПМНЕ, но порачаа дека пописот не смее да се одложува повеќе и оти тука станува збор за статистичка операција, а не за политика.
ВМРО-ДПМНЕ, пак, бара при спроведување да се одземаат отпечатоци од прстите бидејќи, според неа, начинот на кој моментално се планира да се спроведе пописот ќе даде нереални резултати односно ќе испадне дека имаме и до 3 милиони жители.