Во понеделник Северна Македонија за првпат ќе учествува на Самитот на НАТО како полноправна членка. Тоа, според министерката за одбрана, Радмила Шекеринска, е важно бидејќи за првпат ќе имаме влијание или барем збор во процесите кои ќе започнат од Самитот.
„Самитот е важен и ќе започне процеси во НАТО во кои се првпат ние ќе имаме влијание или барем збор и мислам дека од тој аспект многу сериозно пристапивме кон наши подготовки. И денеска ќе имаме координација, претходно правевме некакви проценки околу тоа кои прашања треба ние да ги апострофираме бидејќи за првпат ќе бидете во позиција да кажете нешто, а да не биде само ’ние сакаме да биде членки‘. Тоа е зреење, поголема обврска и обид пред нашите идни евросојузници да се покажеме во позрело светло“,
рече Шекеринска во вечерашното интервју за „360 степени“.
На Самитот говор ќе има и премиерот Зоран Заев кој, според министерката, ќе трае околу 5 минути, исто како и на останатите лидери.
„Во принцип премиерите добиваат некои 5 минути, но верувајте, бидејќи минатиот пат учествуваме речиси како еднакви – тогаш ја имавме поканата, но не бевме полноправна членка, изненадувачки е колку можете како земја да направите впечаток во тие 5 минути затоа што тие 5 минути ги има и Бајден, и Џонсон, и Меркел. И можете да ги видите и разликите и можете да соопштите порака која ви е важна“,
вели Шекеринска.
Според министерката, ќе се разговара на поширока тема, но меѓу поважното е околу тоа каква улога ќе има НАТО во иднина на глобалната сцена односно дали да се отпочнат многу посериозни контакт со земји како Австралија, Нов Зеланд, Јапонија.
„Темата е многу широка, меѓутоа во принцип копјата во следниот период ќе се водат околу тоа каква визија и каква амбициозност имаат земјите-членки за НАТО. Имате една група на земји кои навистина имаат многу поамбициозни планови кои се однесуваат на улога на НАТО која нема да биде само регионална бидејќи НАТО е најголемата воено-политичка алијанса во светот, но во принцип таа е ограничена на два континента – Америка и Европа. Според многумина во Алијансата, НАТО мора да има глобален пристап и да зборува за одредена глобална улога. Една од работите која е на маса е да започнат многу посериозни контакти, консултации, па дури и самити со т.н. демократии кои слично мислат. Оние земји кои припаѓаат на сличен вредносен систем, како Австралија, Нов Зеланд, Јапонија“,
вели Шекеринска која додаде дека сè уште не се зборува за отворање кон нови земји-членки, но оти една од одлуките која ќе се дискутира е дали да се започне со редовни самити на кои ќе бидат поканети и овие земји.