Не сум од оние луѓе кои веруваат во вредности и припаѓаат на некоја партија само како фунционери, вели министерката за одбрана, Радмила Шекеринска, одговарајќи на новинарско прашање дали ќе остане во СДСМ по најавата дека нема да биде дел од раководната структура на партијата.
Министерката потенцира дека во СДСМ била активна и како член во раководството и без функцијата во партиската хиерархија.
„Верувам во работа и сработено, а не во функции. Не мислам дека треба да помогнеме на државата само ако носиме значка на функционер, партиски или државен“,
рече Шекеринска.
На прашањето дали ќе прифати друга функција и дали ако не добие ќе остане тука или ќе замине во Вашингтон, Шекеринска одговори дека би било несериозно од едно место да се префрли на друго.
„Сето останато три години го слушам и никако да се случи. Би сакала малку повеќе да зборуваме за суштински, реални нешта, а помалку да губиме време на дезинформации и кујнски сплетки“,
истакна Шекеринска по приемот на донацијата од 100.000 кинески вакцини во поликлиниката „Јане Сандански“.
Во однос на одбраната, каде што е прв човек, Шекеринска рече дека се исполнети двете клучни цели, членството во НАТО и подобрувањето на условите во Армијата, но преостанува, како што рече, уште многу работа.