Одговарајќи на новинарско прашање, тој рече дека може да потврди дека учебниците за трето одделение се завршени и доставени до сите основни училишта. Од оние, пак, за шесто одделение, како што кажа, одобрени се учебниците по Македонски јазик, Албански јазик, Природни науки, а одобрен и учебникот по Математика, но за него ќе треба да се почека пет дена поради жалбена постапка. Тој рече дека продолжува и доставата на учебниците во средното образование, што доаѓа, како што нагласи, по подолг период од 10 години во кој немало учебници
Министерот за образование и наука Јетон Шаќири најави дека утре Министерството ќе сподели точни информации во врска со планот за достава на учебниците од прво до шесто одделение до сите училишта согласно новата реформа.
Шаќири ова го рече по прашање од новинарите во врска со доставата на учебниците во основно образование, особено за оние што се изработуваат согласно новите наставни програми, за трето и за шесто одделение, а за кои на почетокот на учебната година изјави дека ќе бидат готови во првата недела на септември, односно до крајот на месецов, кога станува збор за учебниците за шесто одделение.
Одговарајќи на прашањето, тој рече дека може да потврди дека учебниците за трето одделение се завршени и доставени до сите основни училишта. Оние, пак, за шесто одделение, како што кажа, одобрени се учебниците по Македонски јазик, Албански јазик, Природни науки, а одобрен и учебникот по Математика, но за него ќе треба да се почека пет дена поради жалбена постапка.
„Ме радува фактот дека учебниците за трето сите се завршени и доставени до сите основни училишта. Што се однесува за учебниците за шесто, исто така, ме радува фактот што Националната комисија ги има одобрено учебниците по Македонски јазик, Албански јазик, Природни науки и учебникот за Математика, за кој ќе треба да чека уште пет дена жалбена постапка, а за претходните – сите се доставени на графичко-техничко и печатење“,
изјави Шаќири пред новинарите по отворањето на Министерската конференција за квалитет на високото образование во Западен Балкан.
Тој рече дека продолжува и доставата на учебниците во средното образование, што доаѓа, како што нагласи, по подолг период од 10 години во кој немало учебници.
„Одредени издавачи кои ги имаат правата на сопственост во издавачката дејност побараа одложување на рокот на договорот што го имаа до 1 септември, побараа уште 30 дена, и до крајот на септември во сите средни училишта, според нивните барања, во гимназиското образование ќе се достават сите учебници“,
рече Шаќири.
Во врска со субвенцираниот студентски оброк, кој ќе се применува со почетокот на новата академска година, односно од наредната недела, министерот потсети дека дневниот износ е зголемен од 120 на 140 денари и посочи дека МОН утре ќе ги соопшти економските оператори каде што студентите ќе можат да ја потрошат субвенцијата за оброк со наменската платежна картичка издадена од Шпаркасе банка.
„Барањето на студентите за зголемување од 120 на 140 денари се постигна, барањето за системско дневно трошење на тие пари се реши со одредена банка која пројави интерес за тоа, а и мрежата е поопширна со економски оператори каде што може да го реализираат износот за студентски оброк“,
рече министерот за образование.
Прашан дали износот од 140 денари за оброк дневно е доволен за да се прехранат студентите, имајќи ја предвид инфлацијата, Шаќири рече дека во законот е дефинирано дека ќе се прават спредбени анализи за зголемување на вредноста при подготовката на буџетот за наредната година.
Министерот за образование беше прашан и за проблемот со Основното училиште „Његош“ во населбата Колонија во Општина Гази Баба, каде што поради немање просторни услови родителите на децата кои учат на македонски јазик протестираат три, а на децата од настава на албански јазик 26 дена.
Имено, учениците Албанци во тоа училиште имаат настава до петто одделение и со години образованието од шесто до деветто мора да го продолжат во други општини. Нивните родители протестираат од почетокот на учебната година, а пред три дена наставата ја бојкотираат и родителите на учениците на македонски наставен јазик кои не се согласуваат таму да се отвори паралелка за шесто одделение на албански јазик. Тие пред училиштето порачаа дека нема можност за воведување нова паралелка. Според нив, министерот врши притисок и се подготвени, како што велат, настава да нема до крајот на учебната година.
Шаќири најави дека утре попладне ќе има состанок со родителите на учениците од ова училиште.
„Три дена протестираат учениците на македонски јазик, а учениците на настава на албански јазик во истото училиште протестираат 26 дена. Се работи за 13 ученици кои завршиле петто одделение и бараат да продолжат од шесто во истото училиште. Имам редовни состаноци, и со родителите Албанци, и со родителите Македонци и утре ќе реализирам состанок со сите нив. За да се отвори нива паралелка, директорката на основното училиште доставува барање и врз основа на анализите, ние тоа барање го доставуваме во Министерството за финансии“,
изјави министерот за образование.
Иницијативата на родителите кои протестираат три дена, како што рече, е затоа што сметаат дека нема простор во училиштето и додаде дека Просветниот инспекторат ја анализирал состојбата.
„Никогаш нема да се донесе одлука на штета на ниту една страна. На градоначалникот на Гази Баба му кажав дека ако е потребно простории во истото училиште, барам најитно да се достави проект за да можеме да го реализираме во тој простор на училиштето. Оваа тема не се дискутира од овој септември туку 20 години. Со Општината дискутираме за долгорочно решение за изградба на училиште во Идризово и барам разбирање за краткорочно решение што треба да го најдеме што побрзо, до петок, без разлика дали се учениците Македонци или Албанци. Се работи само за една паралелка во училиштето“,
рече Шаќири.