Ќе доставам барање до претставниците на СОНК за разбирање и преговорите да продолжат, но и наставата да продолжи, истакна министерот за образование Јетон Шаќири додавајќи оти ќе чека повратен одговор од СОНК во однос на нивниот допис, за потоа, како што рече, да може да ги предвиди соодветните чекори во однос на преговорите
Министерот за образование и наука Јетон Шаќири денеска на прес-конференција истакна дека ќе достави барање до Синдикатот за образование, наука и култура (СОНК) во кое ќе побара од нив продолжување на преговорите, но и продолжување на наставата во училиштата, односно прекин на штрајкот.
Тој додаде оти во моментов не смее да се дозволи децата да не следат настава, затоа од членството на СОНК и од наставниците побара да се вратат на настава, со надеж дека барањето ќе биде прифатено.
„Вчера од мене лично и од сите членови на Владата се побара да продолжиме со секојдневни преговори, а истовремено и наставата да продолжи. Ќе доставам барање до претставниците на СОНК за разбирање и наставата да продолжи, но истовремено во тоа барање ќе има дека ние за најкратко време ќе се усогласиме со нивното прво барање, со системско решавање на второто, третото барање, па и за едно да продолжиме во други соработки освен за плати за да дојдеме до решение за образовниот процес“,
истакна Шаќри.
Меѓу другото, Шаќири изрази надеж дека од понеделник воспитно-образовниот процес ќе се нормализира.
„Верувам дека ако не од утре, од понеделник ќе се нормализира образовниот процес“,
додаде тој.
Во однос на барањата на СОНК за покачување на платите во образованието за 18,4 отсто, Шаќири посочи оти барањето е легитимно и дека повисоки плати ќе има.
„Јас како министер и Владата никогаш не кажавме дека во овој процес не влегуваме за повисоки плати. Барањето за зголемување на платите на наставниците е легитимно и повисоки плати ќе има. Тоа е заложба на Владата и затоа е зголемена минималната плата на почетокот на минатиот месец, со која ќе се усогласат и сите други, и оние во образование, каде што дополнително ќе следува зголемување за одреден процент за кој во моментов сме во преговори. Тоа е процес што ќе продолжи и денес и утре, сè до изнаоѓање конечно и прифатливо решение за сите засегнати“,
нагласи Шаќири и додаде оти Владата има разбирања за економската ситуација, но побара и продолжување на наставата и на преговорите.
Одговарајќи на новинарско прашање во врска со тоа кога ќе се случи следната средба со Синдикатот, министерот Шаќири рече оти преговорите ќе продолжат, но нагласи дека ќе почека повратен одговор од СОНК во однос на писмениот допис од Министерството, за потоа, како што рече, да може да ги предвиди соодветните чекори.
„Очекувам после дописот тие да вратат или да дадат официјален одговор на тоа, а потоа ќе ги предвидам соодветните чекори во однос на тој допис“,
додаде Шаќири.
Вчера попладне се одржа нова средба помеѓу Министерството за образование и СОНК која не заврши со договор помеѓу двете страни, затоа што, како што истакна претседателот на СОНК, од Министерството не добиле конкретен предлог во однос на покачувањето на платите во образованието.
„За жал, немаме добри вести за јавноста, штрајкот ќе продолжи и во наредните денови од причина што немаме конкретно ветување дека зголемувањето на платите ќе биде во висина на некој процент“,
соопшти претседателот на претседателот на СОНК, Јаким Неделков, по вчерашната рунда преговори со МОН