По двете одложувања, денеска се очекува да продолжи судскиот процес за случајот „Рекет“ во Основниот кривичен суд во Скопје. Предвидено е да сведочат неколку сведоци по предлог на првообвинетиот Бојан Јовановски-Боки 13.
Меѓу имињата кои се очекува денеска да бидат сведоци се и пријателот на Боки, Сергеј Варошлија, како и ексградоначалникот на Центар и бизнисмен Владимир Тодоровиќ. Тој требаше да сведочи минатата недела, но испратил известување дека е на службен пат. Тогаш требаше да сведочи и Дејан Панделески, син на осомничениот бизнисмен во „Империја“, Цветан Панделески, но ни тој не се појави, па и неговото сведочење беше поместено за оваа недела.
Боки има предложено вкупно 12 сведоци. Од нив досега сведочеше само адвокатот Васил Димишков, брат на судијката на претходна постапка Весна Димишкова, која постапува во предметот „Империја“.
По сослушувањето на неговите сведоци, судскиот процес ќе продолжи со сведоците на Катица Јанева. Таа има предложено 13, меѓу кои се и повеќето од обвинителите што работеа во СЈО.
Јовановски во „Рекет“ е обвинет за примање награда за противзаконито влијание и за перење пари, а Јанева за злоупотреба на службената положба.