Села го убедува Хоти дека мерката со ПЦР-тестови за Косовци е политички мотивирана

Во објава на Твитер, лидерот на Алијансата за Албанците го замолува косовскиот премиер да не презема реципрочни мерки кон граѓаните на Северна Македонија, затоа што, како што вели, по 15 јули ваквите пречки меѓу двете земји ќе бидат историја

Претседателот на Алијансата за Албанците Зијадин Села бара разбирање од косовскиот премиер, Авдулах Хоти за одлуката на македонската Влада, според која државјаните на Косово при влез во земјава треба да приложат негативен ПЦР-тест, не постар од 72 часа.

Како што наведува Села во објавата на Твитер, овие мерки се политички мотивирани поради стравувањата од изборите на 15 јули.

„Мерките што ги спроведува Владата на Северна Македонија против граѓаните на Косово на заедничките гранични премини се корона-политика мотивирана од стравот од изборите. Го молам премиерот Авдулах Хоти за разбирање и за непреземање слични мерки против граѓаните на Северна Македонија зашто со тоа би се казниле граѓаните на двете држави, особено иселениците, кои се соединуваат со своите семејства во овој момент. По 15 јули ваквите пречки меѓу двете земји ќе се бидат во историјата“,

пишува Села на Твитер.

На 26 јуни земјава ги отвори границите без ПЦР-тест за ковид-19 и 14-дневна изолација. Но, поради ситуација со епидемијата во регионот, од вчера стапи во сила владина одлука со која се бара државјаните на Србија, Косово, Црна Гора и БиХ при влез во земјава да приложат негативен ПЦР-тест, не постар од 72 часа.

Влез со ПЦР-тест во земјава за државјани од четири земји во регионот

Како што објасни министерот за здравство Венко Филипче оваа мерка е донесена согласно сознанијата за епидемиолошката ситуација во овие земји и со цел заштита на нашите граѓани.

Филипче: Препораката за ПЦР-тестови за државјаните на Србија, Косово, БиХ и Црна Гора е врз основа на епидемиолошката слика

Од Алијанса за Албанците и Алтернатива, пак, во денешното соопштение, истакнуваат дека причина е силната поддршка за оваа коалиција за претстојните избори.

„По силната политичка поддршка што дојде од Приштина за коалицијата Алијанса за Албанците – Алтернатива и која се очекуваше да кулминира во текот на последните денови од кампањата, Владата на Северна Македонија ги врати мерките за негативен ПЦР-тест за граѓаните на Косово и некои други соседни земји со сомнителни епидемиолошки оправдувања“,

стои во соопштението.