Спикерот Џафери соопшти дека за расправата се пријавени 30 пратеници
По само 15 минути од почетокот на седницата на чиј дневен ред се предлог законот за ЈО и за измени на Законот за Советот на јавни обвинители, претседателот на Собранието Талат Џафери ја прекина и продолжението го закажа за утре во 11 часот.
Соопшти дека за расправата се пријавени 30 пратеници.
Тој само ја отвори првата точка – расправата за предлог законот за ЈО, по што од говорницата процедурално се појавија координаторите на пратеничките групи на ВМРО-ДПМНЕ и СДСМ.
Никола Мицевски од ВМРО – ДПМНЕ критикуваше зошто седницата почнува во 22 часот кога пратениците се во зградата уште од 9 часот наутро. Тој ја обвини власта дека времето го користела за тргување со гласовите на пратениците.
„Праксата на ова пратеничко мнозинство продолжува и на крајот од мандатот. Почнуваме седница во 22 часот, а пратениците цел ден се во Собранието. Чекавме од 9 часот утринава за започнување на седница во недела кога нема ниту една одржана седница за да почнеме во 22 за да можат да тргуваат со гласовите на пратениците и да договараат непринципиелни работи два дена пред распуштање на парламентот. На се’ личи само не на законодавен дом. Ова што го правите сега и изминатите три години граѓаните го гледаат и многу брзо по распуштањето в недела ќе бидете казнети за овие непринципиелни политики што ги водите. Дали не можеше оваа седница да почне утре во норомална процедура“,
рече Мицевски.
На ова Џафери му одговори дека Собранието според Устав е во постојано заседание и полушеговито му порача „на кого му се спие нека си оди“.
Координаторот на СДСМ Јован Митревски и се обрати на опозицијата, порачувајќи им да бидат искрени и коректни и да признаат дека изминатите денови не ги закажува или ги одложуваа седниците на комисиите за одредени закони.
Пред да соопшти дека ја презакажува седницата Џафери рече дека цел ден добивал пораки од пратениците дека се уморни, но и пораки преку Фејсбук во врска со законот за ЈО.
„Се додека примам пораки дека има можност да се создаде друго мнозинство дека ќе биде поуспешно, јавно ги повикувам партиските лидери доколку сериозно мислат дека имаат потреба да создадат друго мнозинство, јавно ќе организирам преку мојата покана во текот на утрешниот ден да имаме лидерска средба согласно Пржинскиоит договор, согласно договорот за предвремените избори од 12 април, да потврдиме дека има желба да се одржат изборите на 12 април“,
рече Џафери.
Една од пораките на која тој алудираше е онаа на генералниот секретар на СДСМ Љупчо Николовски кој им испрати порака на ДУИ и на ВМРО-ДПМНЕ дека, ако ги кочат процесите, може да не дојде до распуштање на парламентот и да пропаднат вонредните избори.
„Порактите преку Фејсбук сметам дека не се ниту на ниво ниту потребни. Тука ја прекинувам седницата и ја закажувам за 11 часот“, рече Џафери.