На листата на досега 14 градови во кои е регистриран коронавирус денеска првпат се најде и Крива Паланка
Министерот за здравство Венко Филипче изјави денеска дека очекува скоро излекување и на други пациенти заразени од коронавирусот, откако денеска девет пациенти од Клиниката за инфективни болести беа пуштени на домашно лекување. Еден од тие пациенти е од Скопје, а другите се од Дебар.
„Добрата вест е дека се излекувани девет лица кои беа хоспитализирани на Инфективната клиника. Пациентите со полесна клиничка слика закрепнуваат и очекуваме нови излекувани од ковод-19“,
рече Филипче.
За новиот смртен случај, министерот рече дека пациентот е од Дебар, на 79-годишна возраст, со придружни болести. Тој бил дијагностициран на 23 март, а хоспитализиран два дена подоцна.
Денеска има 26 нови случаи на заразени со коронавирус. Со тоа вкупната бројка на заболени е 285 лица. Филипче наброја по градови каде се регистрирани новите случаи на заразени: На листата на градови во кои е регистриран коронавирус денеска првпат се најде и Крива Паланка.
НОВИ СЛУЧАИ:
Дебар – 1
Скопје – 19
Куманово – 3
Прилеп – 1
Тетово – 1
Крива Паланка – 1
ДРУГИ ГРАДОВИ СО КОРОНАВИРУС
Битола
Штип
Струмица
Гевгелија
Струга
Охрид
Гостивар
Кавадарци
Велес
Во изминатите денови, како што информира Филипче, на Клиниката за инфективни болести се примени осум нови пациенти. Сега таму има 47 хоспитализирани пациенти, од кои тројца се поставени на механичка вентилација, на возраст од 50, 63 и 67 години. Девет пациенти се на кислородна поддршка. Во сите други градови стабилна е состојбата на пациентите, со лесна клиничка слика, според известувањата од тамошните здравствени центри. Сите матични лекари се задолжени по два пати дневно да ги контактираат своите пациенти кои се на домашно лекување и да ги известуваат здравствените власти.