Директорот на Светската здравствена организација (СЗО) Тедрос Адханом Гебрејесус потсетува дека утре се навршуваат 100 дена од појавата на коронавирусот. Поточно од денот кога кинеските власти го известија СЗО дека идентификувале избивање на мистериозна пневмонија во градот Вухан.
„Речиси 100 дена поминаа откако СЗО е информиран за тоа“,
напиша Гебрејесус на Твитер.
Тој нагласи дека оттогаш започнале истражувања со голема брзина во насока на развивање тестови и креирање услови за пронаоѓање вакцина.
Додека се заокружуваат првите сто дена од појавата на коронавирусот, главниот град на кинеската провинција Хубеи, каде што за првпат се појави новиот коронавирус, од денеска повторно е отворен по 76-дневна блокада.
Градот со над 11 милиони жители, кој беше најтешко погоден од коронавирусот во Кина, го прослави своето повторно отворање со полноќна игра на светлата.
Властите ги отворија патишта и им дозволија на луѓето да го напуштат градот со автомобил. Вухан од 23 јануари беше практично изолиран од светот поради епидемијата на коронавирусот, а сообраќајот со градот беше целосно прекинат.
Пред повторно да биде отворен, централната кинеска провинција Хубеи објави дека ќе продолжи да спроведува мерки против ковид-19, иако нејзиниот главен град Вухан ја укина забраната за патување.
Факултетите, основните и средните училишта, средните стручни училишта, технички училишта, како и градинките низ целата провинција ќе продолжат со одложување на почетокот на полугодието, се вели во објавата.