Министерот уште еднаш повтори дека ќе се вакцинира со „Астра Зенека“ и увери дека оваа вакцина е безбедна, исто како и сите останатите кои ќе пристигнат во земјата
Министерот за здравство Венко Филипче и во денешната изјава за медиумите не соопшти конкретен датум кога би пристигнале првите вакцини со кои треба да започне масовната вакцинација. Тоа би било на крајот на март или првите недели од април, а имунизацијата ќе започне со вакцините на „Астра Зенека“ или кинеските, зависно кои ќе пристигнат први.
„Масовната вакцинација на населението ќе започне или со вакцината на „Астра Зенека“ или со кинеските вакцини. Ние сме секојдневно во комуникација. Навистина и производителите се соочуваат со предизвик да ги испорачаат потребните вакцини ширум земјата. Имаме некакви најави и тие најави се за крајот на месецот, првите недели на април, но повторно, имајќи го искуството од досега, искуството од останатите земји, искуството со Ковакс системот, сите тие соочени со тој предизвик, тогаш кога ќе бидеме сигурни дека тргнале кон нашата земја ние тоа ќе го објавиме“,
изјави Филипче.
Тој уште еднаш повтори дека ќе се вакцинира со „Астра Зенека“ и увери дека оваа вакцина е безбедна, исто како и сите останатите кои ќе пристигнат во земјата.
„Верувам дека буквално секоја вакцина е безбедна, сомнеж отворија некои несакани ефекти детектирани по вакцинирањето со оваа вакцина заради што некои земји го запреа вакцинирањето, но по соопштението на Европската агенција за лекови дека тоа е безбедна вакцина, сега сите европски вакцини кои ги запреа вакцинирањето ќе го продолжат. Така што, дефинитивно сите вакцини кои ќе влезат во нашата земја, но и овие кои се користат во сите европски земји се безбедни“,
порача министерот.
Што се однесува до досегашната имунизација на здравствените работници, Филипче рече дека првата група од 4 000 доктори веќе е вакцинирана целосно и тече ревакцинацијата со „Фајзер“. Со 3 000 дози на руската „Спутник В“, пак, остануваат да се вакцинираат уште 700-800 лекари.
„Буквално во сите болници, Јавно здравствени установи, лаборатории, приватните здравствени установи, матичните лекари, стоматлози…, сите категории здравствени работници се вакцинираат со динамика која самите ЈЗУ ја даваат, односно сите што работат со пациенти заболени од ковид. Вакцинацијата добро се одвива и кога таа ќе заврши ќе имаме сериозен висок процент на вакцинирани здравствени работници посебно оние што работат со ковид, тие ќе бидат сите заштитени за да можат како најкритична група, посебно сега соочувајќи се со овој бран, да работат заштитено“,
изјави Филипче.