Шекеринска изјави дека очекува пратениците во преостанатите денови до распишувањето на изборите, да носат одлуки што се влог во иднината и во евроатлантските перспективи на земјата
Законот за јавното обвинителство не е единствениот за кој владејачкото мнозинство се надева дека ќе успее да собере 80 гласа за да биде донесен до распуштањето на овој собраниски состав. Како што донесувањето на законот за ЈО се наметна повторно како критериум пред новото одлучување дали Северна Македонија ќе ги почне преговорите со ЕУ, така и законот за одбрана треба да биде претпоследниот потег на овој собраниски состав, пред официјализирањето на членството на земјава во НАТО.
И за двата закона кои се поврзани со евроатлантските процеси на земјава во моментов е неизвесно двотретинското мнозинство, главно, поради бариерите што ги поставува ВМРО-ДПМНЕ. Затоа не е исклучено потребното мнозинство да се обезбедува по заобиколен пат, со гласовите на независните пратеници, иако станува збор за регулативи за кои е пожелно да има консензус меѓу најголемите политички партии.
За разлика од новото законско решение за ЈО, кое сè уште не е влезено во собраниска процедура, законот за одбрана ги помина сите филтри и сега останува само пленарната расправа и гласањето за него. Но ВМРО-ДПМНЕ, само поради еден член, го оспорува целиот закон. Тоа е членот со кој се предвидува преименување на Армијата на Македонија во Армија на Северна Македонија.
Последниот потег што треба да го повлече овој пратенички состав во однос на претстојното членство во НАТО е ратификацијата на Протоколот за членство, кој е најавено дека ќе биде на дневен ред на 11 февруари, односно ден пред распуштањето на Собранието. Речиси е извесно дека ратификацијата во македонскиот парламент ќе биде со одложено дејство, со оглед на тоа што вицепремиерката и министерка за одбрана Радмила Шекеринска денеска потврди дека Шпанија ќе може да го ратификува Протоколот за членство на Северна Македонија во НАТО дури во март, поради сложените процедури во тамошниот парламент.
Шекеринска изјави дека очекува пратениците во преостанатите денови до распишувањето на изборите да носат одлуки што се влог во иднината и во евроатлантските перспективи на земјата.
„Секој од пратениците влегол во парламентот со завет и со обврска да ја приближи оваа држава до НАТО и до ЕУ. За законот за ЈО слушнавме и од официјални претставници на ЕУ дека е клучот за побрзо членство и за побрз почеток на преговори. Меѓутоа, кај законот за одбрана работите се уште повидливи. Тоа е последниот чекор што треба да не направи де факто реална земја членка на НАТО. И не мислам дека кој било пратеник ќе одлучи да се коцка со нешто што толку тешко го стекнавме“,
рече Шекеринска.
Таа верува дека ќе има двотретинско мнозинство за законот за одбрана, но посочи дека историјата ќе суди за сите оние што ќе одлучат, како што рече, да бидат од другата страна.
„Да зборувате за НАТО-членство, да се залагате за НАТО-членство, а потоа да не го гласате законот за одбрана е неприфатливо. Се надевам и очекувам дека секој пратеник во нашето Собрание кој е соочен со обврска да се поддржи овој успех на државата ќе го направи вистинскиот чекор, ќе ја донесе вистинската одлука и заедно со ратификацијата на НАТО-протоколот ќе ја имаме и целосната законска регулатива која го носи законот за одбрана,“
оцени Шекеринска.
Според вицепремиерот за европски прашања Бујар Османи, законот за ЈО не е формален, пишан услов за започнување преговори, меѓутоа е посакуван исход од земјите членки на ЕУ за да донесат позитивна одлука. Тој рече дека црвените линии за постигнување компромис за законот со опозицијата е продолжување на предметите од СЈО.
„За ДУИ е важно да се донесе законот. Иако законот не е формален, пишан услов за отпочнување на преговори, тој е врежан во перцепцијата на земјите членки и е посакуван исход за да донесат позитивна одлука. Нам ни е многу важно тој закон да го донесеме со консензус со опозицијата, бидејќи тука би испратиле и друга симболична порака дека сме едногласни кога се работи за борба против корупција на високо ниво. Би биле конструктивни доколку опозицијата учествува во донесување на законот, се разбира, запазувајќи некои основни принципи, односно црвени линии кои ги имаме, а тоа е дека работата на СЈО мора да продолжи. Не зборувам за СЈО како институција, туку за она што го имаат започнато како индиции, предмети…“,
изјави Османи, кој, исто така, е опфатен со една од поновите истраги што ги отвори СЈО, пред да почне растурањето на институцијата.
Во парламентот не се исклучува можноста гласањето за законот за одбрана да биде закажано на 11 февруари. Од пратеничката група на СДСМ велат дека, и без ВМРО-ДПМНЕ, имаат и еден глас плус за законот за одбрана да биде донесен во овој собраниски состав. Сепак, посочуваат дека е добро оваа регулатива да биде донесена со консензус.