Претседателот на парламентот вели дека уште истиот ден, веднаш по распуштањето на Собранието, би можел да ги распише десеттите по ред парламентарни избори или петти вонредни во земјава
Претседателот на парламентот Талат Џафери планира на претпоследниот работен ден на овој собраниски состав – 11 февруари да се одржи и претпоследната пленарна седница, со единствена точка на дневен ред – ратификација на Протоколот за членство на Северна Македонија во НАТО. Во изјава за „360 степени“, Џафери вели дека следниот ден ќе се одржи седницата за распуштање на парламентот, така што ќе останат цели 60 дена до одржувањето на парламентарните избори на 12 април.
„До 11 февруари не е исклучено да заврши и постапката за ратификација на Протоколот за НАТО во Шпанија. Како и да биде, планирам на 11 февруари да закажам посебна седница за Протоколот да биде изгласан и во нашиот парламент. Следниот ден ќе се одржи седницата за распуштање на Собранието. Очекувам дискусијата по тој предлог да заврши до полноќ, затоа што нема тука што многу да се зборува, со оглед на тоа што сите партии се согласија за предвремени избори,“
вели Џафери.
Претседателот на парламентот вели дека уште истиот ден – на 12 февруари, би можел да ги распише изборите, од кога ќе почнат да течат роковите за спроведување на изборните дејствија, согласно Изборниот законик и роковникот што треба да го донесе ДИК. Ако, пак, во меѓувреме, не заврши процедурата во Шпанија за ратификација на Протоколот за НАТО, ратификацијата во парламентот во Скопје би била со одложено дејство, со оглед на тоа што Северна Македонија треба да биде последната земја што ќе ја заврши процедурата што води кон нејзино официјално членство во НАТО.
Пред седниците за Протоколот за НАТО и за самораспуштање на парламентот, Џафери планира уште една седница, која ќе почне на 4 февруари. Тогаш, на дневен ред, како што вели, ќе бидат ставени закони што ќе бидат доставени во меѓувреме, како и закони во второ или во трето читање. Според тоа, 4 февруари е последниот рок до кој на дневен ред би можеле да бидат ставени законот за јавно обвинителство, за кој моментно се водат преговори меѓу партиите, како и измените на Изборниот законик, согласно со препораките на ОБСЕ/ОДИХР.
Пратениците денеска треба да ја продолжат 126 седница, што почна на 23 декември, а на чиј дневен ред се дури 125 точки, во поголем дел предложени од политичката влада на СДСМ и на ДУИ. Досега се поминати само дваесетина точки, а последен во агендата е законот за поништување на лустрацијата. Џафери вели дека од пратениците и политичките партии зависи дали сите предложени закони ќе стигнат на гласање до распуштањето на парламентот.
„Парламентот расправа за точките за кои е завршена процедурата во матичните комисии. Од комисиската расправа, а потоа и од расправата на пленарната седница, зависи со кое темпо ќе се носат законите. Поточно, дали ќе бидат донесени сите или дел ќе пропаднат, со оглед на тоа што по 12 април ќе имаме нов парламент кој потоа треба да избере и нова влада“,
вели Џафери.
Претстојните десетти парламентарни избори се петти вонредни во историјата на плурализмот во земјава. Овој пратенички состав ја почна конститутивната седница на 30 декември 2016 година, по изборите на 11 декември, кои претставуваа своевидно финале на големата политичка криза во земјава, по објавувањето на аферата со масовното прислушување. Првпат, конститутивната седница на парламентот траеше дури четири месеци – период во кој пратениците воопшто не заседаваа. Конститутивната седница заврши со насилствата во законодавниот дом на 27 април 2017 година, кога Џафери беше избран за прв парламентарец. Иако сегашните пратеници ќе се самораспуштат на 12 февруари, нивниот мандат ќе заврши некаде кон крајот на април, кога треба да се конституира новиот десетти собраниски состав.
*Поврзана вест
Собранието, сепак, ќе треба предвреме да го ратификува членството во НАТО