Заврши последната седница на деветтиот собраниски состав. Парламентот од утре нема да заседава – се до конституирањето на новиот состав – во почетокот на мај
Со 108 гласа „за“ од вкупно 117 присутни, парламентот ја донесе одлуката за распуштање. Многу брзо, можеби уште денеска, спикерот Талат Џафери треба да ги распише десеттите парламентарни избори или петти вонредни во историјата на плурализмот во земјава. Изборите треба да се одржат на 12 април, како што лани во октомври се договорија лидерите на парламентарните партии.
Дискусии
Координаторот на пратеничката група на СДСМ Јован Митровски рече дека овој собраниски состав помина низ многу премрежија, но дека донесе и многу важни одлуки за иднината на државата.
На 12 април граѓаните ќе се соочат со избор меѓу две дијаметрално спротивни политики. Едната политика е на СДСМ и тоа е политика на просперитет, развој и остварување на интеграциските процеси на државата. За другите политиките нема да коментирам, затоа што граѓаните добро знаат какви се,
рече Митревски.
На ваквиот говор на Митревски, Крсто Јовановски од ВМРО-ДПМНЕ возврати со канонада од навреди и обвинувања, посочувајќи дека се чувствува како Дон Кихот и со оценки дека владејачкото мнозинство е „јадно и мизерно“.
Во овие три години Македонија се претвори во епицентар на лагите. Тие клокотат од секаде, а луѓето од белиот свет што доаѓаат тука се чудат што е ова. Така е кога дрскиот ум на криминалците ќе се залаже дека е најумен и дека е елита,
рече Јовановски.
Координаторот на ВМРО-ДПМНЕ Никола Мицевски рече дека земјава се наоѓа во тешка политичка криза и хаос, затоа што, како што оцени, сведоци сме на невидени криминали.
Само пред неколку часа сите бевме сведоци на суспендирање на демократијата и правдата, со нерегуларното гласање за Законот за ЈО. Сите граѓани, во овие три години, на своја кожа почувствуваа што значи кога СДСМ ја има целата власт во Македонија. Многу криминали, промена на името на државата и на Уставот, голем број на нерешени убиства, насилничко носење на голем број законски решенија, газење на угледот на државата, задушување на слободното новинарство…,
набројуваше Мицевски.
Завршниот говор на Џафери
Прв и последен говореше спикерот Талат Џафери. Првиот пат како предлагач на точката за распуштање на парламентот, а вториот пат како претставник на пратеничката група на ДУИ. Тој рече дека и сега го носи истиот костум, како и денот кога беше избран за прв парламентарец – на 27 април 2017 година.
Не ги изневеривме нашите гласачи. Едно од ветувањата што им ги дадовме беше токму мојот избор на чело на Собранието како прв Албанец на таа функција во независноста. Ветивме и регулирање на употребата на албанскиот јазик. Северна Македонија наскоро ќе биде членка на НАТО, а во очекување е и на одлука за почеток на преговори со ЕУ,
рече Џафери.
Тој му се обрати и на лидерот на ДУИ Али Ахмети, посочувајќи дека 10 минути говор се малку за да се наброи што се оваа партија остварила од своите програмски определби. Рече дека на изборите очекува дека ДУИ повторно ќе добие легитимитет за да продолжи со исполнување на партиската програма, за добро на граѓаните.
Последниот работен ден на овој парламент помина „турбо“. Со по 80 гласа беа донесени законите за јавно обвинителство и за одбрана. Исто така, беше донесен Закинот за Советот на јавни обвинители, а на продолжението на 131. седница, што беше закажано во меѓувреме, беа изгласани уште пет закони.