Родилката и бебето се тестирани на ковид и двајцата се негативни
Бремената Авганистанка која вчера пристигна со првата група на граѓани кои привремено ќе бидат згрижени во земјава, се породи на Клиниката за гинекологија во Скопје. Таа роди здраво машко бебе и двајцата се во добра здравствена состојба.
Според информациите од Итната медицинска помош меѓу вчера пристигнатите Авганистанци се уште четири трудници, но досега не побарале лекарска помош.
Проф. д-р Марјан Стојовски, кој ја породи Авганистанката за ММС вели дека таа и бебето се чувствуваат добро и дека мајката била пресреќна, дека се се завршило како добро.
„Вчера била примена со некои почетни контакции, но утрово пациентката се породи. Роди здраво машко дете, кое тежи 3 200 килограми. И мајката и бебето се чусвтвуваат добро, и таа и бебето се ковид-негативни. Ова е нејзино второ дете. Мајката се заблагодари многу на целиот тим бидејќи направивме напори сето тоа да трае многу кратко“,
вели д-р Стојовски.
Од Владата информираа дека на граѓаните кои вчера пристигнаа од Авганистан, волонтерите од Црвен крст им поделиле пакети со вода, заштитни маски и основни хигиенски производи и флаери за мерките во нашата држава поврзани со ковид-19 вирусот.
„Во хотелот им беа дистрибуирани пакети за добредојде со дополнителни количини маски, средства за дезинфекција, инфоматеријали за градот Скопје, мапа на град Скопје, евидентни листови за посебни барања во однос на здравствената состојба, картички со телефони на Црвениот крст за итни состојби и кутија локум. Црвениот крст во хотелот има 30 дежурни лица, волонтери организирани во три смени кои се на располагање на граѓаните. Учествуваат во подготовка на детско катче, подготовка на инфо катче со 10 лаптопи и интернет пристап. Тие ќе се грижат за дистрибуција на дополнителни средства за хигиена, облека, обувки. Ќе бидат вклучени во активности за спојување на семејствата, и за да пружат медицинска заштита во однос на лекови за хронична терапија. По барање и потреба на граѓаните на располагање има и психолог“,
велат од Владата.
Во текот на наредните денови заедно со ПЦР-тестовите ќе се направат и прегледите за проценка на здравствената состојба на граѓаните од Авганистан. Планирани се интернистички прегледи за повозрасните и педијатриски преглед за децата. Министерството за здравство ќе обезбеди ПЦР-тест и можност за вакцина.