Првообвинетиот Бојан Јовановски денеска на јавна седница во Апелацискиот суд, ќе бара укинување на притворот
Сведоци што ги предложи првообвинетиот Бојан Јовановски-Боки 13 ниту денеска не дојдоа на закажаното рочиште за „Рекет“ во Основниот кривичен суд во Скопје.
Еден од сведоците кој требаше сведочи денеска е Дејан Панделевски, син на осомничениот бизнисмен во „Империја“, Цветан Панделевски. Курирот не го нашол на адресата на работното место која била доставена, а оттаму судот бил известен дека Панделевски е на службено патување. На другиот сведок не му била уредно доставена поканата.
Тоа беше причина да се одложи и денешното судското рочиште.
И вчера беше предвидено да се сослушаат негови сведоци. Требаше да се појават ексградоначалникот на Центар и бизнисмен Владимир Тодоровиќ и уште едно лице. Но Тодоровиќ испратил известување дека деновиве е службено надвор од државата, а вториот сведок не дојде зашто не добил уредна покана.
Во својата листа Боки 13 има предложено вкупно 12 имиња. Од нив досега сведочеше само адвокатот Васил Димишков, брат на судијката на претходна постапка Весна Димишкова која постапува во предметот „Империја“.
Тие треба да се сослушаат на рочиштата закажани за наредната недела. Првото наредно рочиште е закажано за во вторник на 3 март. Меѓу имињата што се на листата на Боки, покрај Тодоровиќ, Панделевски и веќе сослушаниот Димишков, е и сопругот на Фросина Ременски, Јовче Ременски, како и Сергеј Варошлија.
По сослушувањето на сведоците на Боки 13, судскиот процес ќе продолжи со сведоците на Катица Јанева. Таа има предложено 13 сведоци, меѓу кои се и повеќето од обвинителите што работеа во СЈО.
Јовановски во „Рекет“ е обвинет за примање награда за противзаконско влијание и за перење пари, а Јанева за злоупотреба на службената положба.
Од отворањето на истрагата за „Рекет“ на 15 јули 2019, Јовановски се наоѓа во притвор. Тој досега неколкупати бараше укинување на притворот, пред сè поради здравствената состојба, но сите барања му беа одбиени. Денеска повторно на јавна седница во Апелацискиот суд Скопје, Боки 13 ќе бара укинување на притворот.
Јанева, исто така, влезе во притвор во август лани, но по околу три месеци, во ноември 2019 оваа мерка и беше заменета со куќен притвор.