Со точно 61 глас „за“, Собранието го прифати предлогот на Судскиот совет, за кој пред неколку седмици се водеше бурна расправа која, пак, беше иницирана од ВМРО-ДПМНЕ
Се комплетира Уставниот суд, откако Собранието попладнево, конечно, ја избра Добрила Кацарска за уставна судијка, со што завршува нејзиниот мандат како судијка во Кривичниот суд во Скопје.
Со точно 61 глас „за“, Собранието го прифати предлогот на Судскиот совет за избор на Кацарска на новата функција.
Претресот по оваа точка заврши пред неколку седмици, ама гласањето тогаш беше одложено поради немање кворум, затоа што дел пратеници од мнозинството беа во изолација.
Расправата пред изборот на новата уставна судијка помина во мошне бучна атмосфера, поради противењата на опозицијата судијката, која водеше дел од процесите против поранешни функционери на ВМРО-ДПМНЕ, да влезе како член во Уставниот суд.