„Кацарска значи неправда“, „Стоп за трас-трас уставен судија“… пишува на дел од транспарентните со кои опозициските пратеници парадираат низ салата, свиркајќи преку маските
Со свирчиња и со транспаренти, пратениците на ВМРО-ДПМНЕ го означија денеска почетокот на собраниската расправа за избор на судијката од Кривичниот суд во Скопје Добрила Кацарска за член на Уставниот суд.
„Кацарска значи неправда“, „Стоп за трас-трас уставен судија“, „Кацарска извршител на мафијата“… пишува на дел од транспарентните со кои опозициските пратеници парадираат низ собраниската сала или, пак, мафтаат од своите места.
И додека пратеничката на СДСМ Снежана Калевска Ванчева, во неколку наврати, им реплицираше на пратениците на ВМРО-ДПМНЕ за обвинувањата што ги изнесуваа за Кацарска, опозиционерите свиркаа во позадина.
Свирче доби и претседателот на парламентот Талат Џафери кој се пошегува дека е дискриминиран зашто не може да свирка, иако Собранието неодамна го донесе Законот за заштита од дискриминација.
Откако Дафина Стојановска од ВМРО-ДПМНЕ му даде свирче, Џафери свирна преку заштитната маска и забележа дека и тоа е демократија.
Расправата за изборот на Кацарска почна по паузата што ја побара координаторот на пратеничката група на ВМРО-ДПМНЕ Никола Мицевски, за, како што рече, опозицијата да ја разгледа подобро биографијата на кандидатката за уставна судијка.
„Очекував барем малку доблест од Судскиот совет и од владејачкото мнозинство. Да слушнеме зошто Добрила Кацарска е предложена за уставен судија. Ова што денеска го промовирате е лоша пракса, зашто бирањето уставен судија не е бирање судија во втора лига фудбал“,
рече Мицевски.
Пратениците од опозицијата, потоа, ја критикуваа Кацарска, како блиска до СДСМ и како пример за пристрасност, необјективност и селективност на судската власт во земјава, посочувајќи ја како одговорна за затворската казна на ексминистерката за внатрешни работи Гордана Јанкуловска, која, како што беше речено, била несоодветно третирана додека беше бремена…
„Вмровското месо е жилаво и може да се задавите“,
порача од говорницата пратеничката Стојановска, зборувајќи за тоа како неистомислениците на актуелната власт биле цел на политички прогон.
Љупчо Балковски од ВМРО-НП, кој е во пратеничката група на СДСМ, им посочи на опозициските пратеници дека ВМРО-ДПМНЕ треба да се срами поради ангажманот во партијата на поранешниот министер за правда Михајло Маневски и неговата сопруга.
„Михајло и Филимена Маневски го уништија целиот правен систем во Македонија. Беа обвинители во социјализмот, а потоа вие ги земавте како ваши членови. ВМРО-ДПМНЕ треба да се срами поради тоа“,
рече Балковски.
Како судијка во Кривичниот суд во Скопје, Кацарска беше вклучена во дел од предметите што ги отвори СЈО, односно што произлегоа од снимките од прислушуваните разговори. Таа им ја одреди затворската казна на Јанкуловска и на експремиерот Никола Груевски за случајот „Тенк“, поради што тој избега од државата кога пресудата стана правосилна.
Кацарска го судеше и најобемниот предмет за насилствата во парламентот на 27 април 2017 година, при првиот избор на Џафери на чело на Собранието.
Судскиот совет, кон крајот на септември, едногладно одлучи да ја кандидира Кацарска за уставна судијка, на местото на Владимир Стојановски, кому му истече мандатот.
Кацарска, покрај обвинителката Вилма Русковска, се спомнуваше и во спотови на ВМРО-ДПМНЕ на неодамнешните парламентарни избори, во контекст на критиките на опозицијата за состојбите со правосудството во земјава.