Филипче информираше дека денеска на владина седница ќе се најде предлогот на Управувачкиот комитет за кризни ситуации, кој бара ограничување на масовните јавни собири
Лице од Струмица, кое се вратило од Италија на 22 овој месец, е најновиот случај во земјава за кој денеска се вршат тестирања дали е позитивен на коронавирус. Како што соопшти министерот за здравство Венко Филипче утрово на прес-конференција, лицето само се пријавило бидејќи имало температура. Неговите резултати се очекуваат во текот на денот.
За пациентката која досега е единствен потврден заболен со коронавирус во земјава, Филипче рече дека е во добра здравствена состојба, без промени од претходните денови, се наоѓа на Инфективната клиника во изолација и, според лекарите, таа влегува во фаза на заздравување.
Во домашна изолација остануваат и 12-те лица кои биле во контакт со неа и кај кои состојбата е непроменета.
Во меѓувреме, во домашна изолација се ставени и двајца државјани на Бугарија кои работат за битолска фирма и сами пријавиле дека престојувале во Северна Италија, но не можеле да потврдат дека имале контакт со некој заболен.
Филипче информираше дека денеска на владина седница ќе се најде предлогот на Управувачкиот комитет за кризни ситуации, кој бара ограничување на масовните јавни собири и ова, како што рече, е со посебен акцент на двата карневала во Струмица и во Прилеп кои треба да се одржат деновиве.
Тој презентираше и бројки за заразени во Европа од коронавирусот, при што рече дека вкупно се 774 од кои 650 се во Италија, но од вчера случаи се регистрирани и во земји кои досега не беа на оваа листа како Естонија, Данска, Холандија и Литванија, а на светско ниво на мапата се вклучува и Нигерија со потврден случај на ова заболување.
За попладне најави нова прес-конференција за состојбата со коронавирусот во земјава.