Американската амбасадорка Анџела Агелер вчера ги оцени како лажни вести најавите дека некој ќе може да го репреговара договорот кој беше постигнат помеѓу С Македонија и Бугарија минатата година за вметнување на Бугарите во Уставот
Прашан за коментар на ваквата изјава на Агелер, портпаролот на опозициската ВМРО-ДПМНЕ, Наум Стоилковски, во краткиот одговор рече дека партијата се бори за заштита на македонскиот идентитет
ВМРО-ДПМНЕ се бори и се залага за фер шанса и за заштита на македонскиот идентитет и посебност. Вака одговори портпаролот на опозициската ВМРО-ДПМНЕ, Наум Стоилковски, на новинарско прашање како ја оценуваат изјавата на американската амбасадорка Анџела Агелер дека е лажна вест можноста за репреговарање на Преговарачката рамка за членство во Европската Унија.
„ВМРО-ДПМНЕ се бори и се залага за фер шанса и за заштита на македонскиот идентитет и посебност и тоа се легитимни барања, легитимна борба и ќе продолжиме да се бориме!“,
рече Стоилковски.
Амбасадорката Агелер вчера ги оцени како лажни вести најавите дека некој ќе може да го репреговара договорот кој беше постигнат помеѓу С Македонија и Бугарија минатата година за вметнување на Бугарите во Уставот. Како што објасни таа во гостување на ТВ Канал 5, невозможно е и да се направи подобар договор кој сè уште не сме го откриле, па затоа ги повика сите политички чинители, наместо да бидат заглавени во историски прашања и контексти, да работат за интересите на граѓаните и да ја придвижат С Македонија кон Европската Унија, бидејќи тоа е местото каде што постојат можностите за подобро образование, социјала и економски раст.
Инаку, од опозициската ВМРО-ДПМНЕ, откако беше постигнат договорот со Бугарија со кој државава треба да направи промени во Уставот и во него да се внесат Бугарите, во повеќе наврати изјавија дека кога ќе дојдат на власт, ќе репреговараат со Софија.