Кузеска додаде дека сè што Маѓар сега разоткрива во Унгарија – перење пари, контрола на медиуми, тајни бизниси и корупција – директно се пресликува и во Македонија
Портпаролката на СДСМ, Богданка Кузеска, на денешната прес-конференција, повикувајќи се на случувањата во Унгарија и изјавите на лидерот на победничката партија, Петер Маѓар, Кузеска најави дека „вистината наскоро ќе излезе на виделина“ и во Македонија.
Според СДСМ, политичките случувања во Унгарија каде Петер Маѓар јавно зборува за изнесување милијарди форинти во други земји и контрола на медиуми од страна на соработниците на Орбан, директно ќе се рефлектираат и во земјава.
„Маѓар јавно соопшти дека Орбановите тајкуни масовно префрлаат десетици милијарди форинти во Обединетите Арапски Емирати, САД, Уругвај и други далечни земји. Дека се продаваат медиуми и телевизии по цени под пазарната вредност. Дека очекува масовно повлекување и бегство на Орбановите најблиски соработници и нивните семејства, за што побара институционални реакции за тоа да не се дозволи“,
рече Кузеска.
Кузеска додаде дека сè што Маѓар сега разоткрива во Унгарија – перење пари, контрола на медиуми, тајни бизниси и корупција – директно се пресликува и во Македонија.
Таа повтори дека сега граѓаните на Македонија ќе имаат можност да го видат она што СДСМ го кажувале месеци наназад.
Според СДСМ, Мицкоски и целата партија се најблиските Орбанови партнери и пријатели на Балканот.
„Повеќе од 40 отсто од медиумскиот простор во Македонија е во рацете на Орбановата мрежа. Компанијата ‘Фор-ај-џи’, блиска до Орбан, ја купи лиценцата за четвртиот мобилен оператор токму за да ја поврзе содржината на нивната медиумска мрежа“,
рече Кузеска.
Таа рече дека постојат договори во енергетиката со луѓе блиски до Орбан, кинески кредити од преку милијарда евра кои поминале преку Будимпешта, железнички проекти и обиди да се врзе Македонија со бизниси преку коридорот кој го контролира Орбан и неговите партнери.
„Има занемарување на Коридор 8 и префрлање кон Коридор 10, поради што изгубивме европски средства“,
додаде портпаролката Кузеска.
Од опозициската партија сметаат дека ВМРО-ДПМНЕ не функционира само како политичка партија, туку како дел од регионална криминална мрежа заедно со Виктор Орбан и српскиот претседател Александар Вучиќ.
„Петер Маѓар го нарекува Орбан шеф на мафија. СДСМ веќе со месеци вели дека ВМРО е криминална организација која ја зароби државата. Доаѓа времето на вистината, правдата и одговорноста“,
додаде Кузеска.
Вчера, лидерот на СДСМ Венко Филипче во објава на Икс напиша дека е почната акцијата против Орбановата мафија.
„Изгледа моето ‘чувство’ е посилно од она што го гледавме на ТВ и го слушнавме во Собранието. Како што најавив, акцијата за разоткривање на Орбановите мафијашки бизниси во Унгарија започна. На ред се и неговите медиумски мрежи, а со нив и тесните врски на Мицкоски и целата криминална организација ВМРО со Орбан. Конечно, граѓаните ќе можат јасно да видат сè што најавуваме во последните шест месеци. Наскоро доаѓа времето на вистината, правдата и одговорноста во Македонија”, се вели во објавата на Икс на Венко Филипче.
Реакцијата на Филипче, како што велат од СДСМ, доаѓа по објавата на Маѓар дека олигарси поврзани со Виктор Орбан префрлаат десетици милијарди форинти во Обединетите Арапски Емирати, Соединетите Американски Држави, Уругвај и други далечни земји.