После сите штети што ги нанесе врз енергетскиот систем, преку расипничките и криминални проекти, ВМРО-ДПМНЕ нема никаков кредибилитет да зборува за енергетиката, реагираат од СДСМ откако од најголемата опозициска партија ги обвинија социјалдемократите за поскапувањето на струјата.
Додека ВМРО-ДПМНЕ владееше, а Мицкоски му беше советник за енергетика на Груевски, велат од СДСМ, цената на електричната енергија порасна за 100 отсто, евтината тарифа на струјата беше укината, а државата беше зависна од увоз на скапа струја.
Одлуката за корекција на целата, посочува СДСМ, ја донесе независно тело.
„За разлика од нив, СДСМ во изминатите 3 години направи сериозни реформи во енергетиката. Се покажа дека реформскиот процес во енергетиката за заштита на потрошувачите, транзицијата на замена на јаглен со сонце-на обновливите извори на енергија и правото на избор се единствениот вистински пат кој гарантира отпорност на енергетскиот сектор и во вакви нови околности. Одлуката за корекцијата на цената на струјата е донесена од страна на независно, професионално тело, Регулаторната комисија за енергетика, за да се задржи функционалноста на енергетскиот систем во вакви вонредни состојби предизвикани од последиците на коронакризата“,
велат од СДСМ.
За да се заштитат граѓаните, додаваат оттаму, евтината тарифа останува на сила во дневните и ноќни интервали исто како и до сега. Преку евтината тарифа, според нив, 15 милиони евра годишно остануваат кај граѓаните.
Вчера, Регулаторната комисија донесе одлука цената на електричната енергија што ја плаќаат домаќинствата на регулираниот пазар да се зголемуви за 7,42 отсто, а граѓаните и понатаму да можат да ја користат евтината тарифа во истите период како и досега.