Наместо очајно да се обидува да бара алиби и изговори, ВМРО-ДПМНЕ вината во поразот да ја бара во своите редови, велат од СДСМ како реакција на изјавите од ВМРО-ДПМНЕ дека изборите се поткупени и недемократски.
„Во белиот дворец сè уште не можат да се помират со поразот што го доживеаја на 15 јули и затоа ВМРО-ДПМНЕ секојдневно бара ново алиби. Колку и да се обидува да манипулира опозициската партија, Изборниот законик во однос на платеното политичко рекламирање и поделбата на просторот е јасен. Согласно резултатите од претходните парламентарни избори, најголемите две владејачки и опозициски партии беа СДСМ, ДУИ, ВМРО-ДПМНЕ и БЕСА. Токму согласно таа распределба е распределена и Државната изборна комисија. Дали според ВМРО-ДПМНЕ и ДИК е незаконска?“,
се вели во соопштението на СДСМ.
Тие додаваат дека парламентарните избори одржани на 15 јули биле фер, слободни и демократски, а граѓаните јасно ја изразиле својата волја.
„СДСМ ја донесе слободата, ги ослободи граѓаните, компаниите, институциите, медиумите од стегите на режимот, криминалното и коруптивно однесување на деструктивната ВМРО-ДПМНЕ. Времето на медиумски мрак за кое лицемерно зборува денеска ВМРО-ДПМНЕ, заврши одамна, со падот на нивниот 11 годишен режим“,
велат од СДСМ.