„Колку и да сакав да бидеме фини, вие не сте фини, наместо овде да седите и да нè слушате за нашите предлози, вие излегувате на прес и ги плукате сите по ред“, реагираше пратеничката Дафина Јованоска-Стојаноска
Во ВМРО-ДПМНЕ не се откажуваат од партиски инсталации во судството, нешто што беше нивна одлика за време на 11-годишниот режим. Тоа се гледа и по нивните предлози за нови уставни судии, критикуваше владејачкиот СДСМ непосредно пред почетокот на денешната седница на собраниската Комисија за прашања за изборите и именувањата.
На дневен ред на оваа комисија е дискусија за предлозите за уставни судии кои беа утврдени на 13 мај. Предложени се девет кандидат, од нив тројца од владејачкото мнозинство (Љубомир Јовески, Фатмир Скендер и Татјана Васиќ), а шест од опозицијата (Тодор Витларов, Воислав Димоски, Саво Климовски, Родна Живковска, Весна Јовановска и Бранко Секулоски). Од деветтемина, ќе треба да се изберат тројца, а дел опозициските предлози наидоа на остри критики.
„Саво Климовски – докажан бранител на режимот. Саво Климовски беше еден од говорниците на протестите пред 27 април кога ги хушкаше граѓаните да се спротивстават на промената на власта. Неговиот син Александар Климовски исто така бранител на режимот, денес е стратешки соработник на Христијан Мицкоски. Понатаму ВМРО-ДПМНЕ ја предлага Родна Живковска, мајка на Иван Живкоски, некогашен партиски избран лидер на студентите, денес претседател на Совет на Општина Кисела Вода од редовите на ВМРО-ДПМНЕ и адвокат на градското јавно претпријатие Лајка. Како предлог за уставен судија од пратениците од ВМРО-ДПМНЕ е и Весна Јовановска, некогашна пратеничка од оваа партија. Еве како ВМРО-ДПМНЕ го замислува Уставниот суд, како место за згрижување на свои партиски кадри, нешто слично што го прави со секоја институција со која раководи нивен кадар“,
рече пратеничката на СДСМ, Фаница Николоска.
Пратениците од ВМРО-ДПМНЕ, пак, им замерија на колегите од власта зошто уште пред да почне дискусијата излегле на прес и плукале по нивните кандидати.
„Пред да се отвори овде дебата, колешката Фаница Николовска на прес плука по нашите предлози за кандидати. Се повикувате дека кандидатка била претходна пратеничка? Дали знаете за предлогот Весна Бендевска да биде членка на Антидискриминаторска комисија која сите ја гласаа, дури и опозицијата? Како не ви е срам, зошто бегате од дебата на оваа седница, да разговараме и за вашите кандидати? Зошто излегувате на прес и зборувате за режим? Ова овде е режим. Колку и да сакав да бидеме фини, вие не сте фини, наместо овде да седите и да нè слушате за нашите предлози, вие излегувате на прес и сите по ред ги плукате. Што да направиме ние за вашите тројца?“,
рече пратеничката Дафина Јованоска-Стојаноска на седницата на Комисијата пред да се отвори дебата за секој кандидат поединечно.