Партијата тврди дека со усвојувањето на овие закони се отвора патот за побрза и поевтина изградба на четирите автопатски делници од коридорите 8 и 10-д, а дека нивната изградба ќе значи прво поврзување на земјава кон запад и кон исток
Петте закони, кои Владата ги поднесе до Собранието со европско знаменце, и кои претходно го поминаа филтерот на собраниската Комисија за европски прашања, вчера беа изгласани од пратениците од мнозинството
Владејачкиот СДСМ денеска преку писмено соопштение до медиумите се пофали со изгласаниот пакет закони поврзани со изградбата на коридорите 8 и 10-д што ќе ги гради американско-турскиот конзорциум „Бехтел и Енка“.
Петте закони, кои беа поднесени до Собранието со европско знаменце, и кои претходно го поминаа филтерот на собраниската Комисија за европски прашања, вчера беа изгласани од пратениците од мнозинството.
Социјалдемократскиот сојуз во писменото соопштение тврди дека со усвојувањето на овие закони се отвора патот за побрза и поевтина изградба на четирите автопатски делници од коридорите 8 и 10-д, а дека нивната изградба ќе значи прво поврзување на земјава кон запад и кон исток.
„Собранието на Република Северна Македонија ги донесе измените и дополнувањата на законите за изградба на стратешки инфраструктурни проекти од национален интерес. Реализацијата на овој стратешки проект, каде е предвидено да се вклучат домашни компании, значи нови 8 000 работни места, нови инвестиции од 1,3 милијарди евра и номинален раст на БДП за 2 отсто годишно во наредните пет години. Тоа е директен импакт врз македонската домашна економија и е трајна вредност во инфраструктурата“,
се наведува во соопштението на СДСМ.
Со изградбата на овие два коридори, велат од партијата, од кружен тек на Балканот, Северна Македонија станува вистинска крстосница на Балканот.
Петте закони поврзани со изградбата на коридорите, што претходно ги разгледуваше Комисијата за европски прашања, на вчерашната пленарна седница во Собранието, беа усвоени со по 62 гласа „за“ и по 43 „против“. Единствено за измените на Законот за урбанистичко планирање, „против“ гласаа 44 пратеници.
Покрај измените од Законот за урбанистичко планирање, Собранието ги изгласа и измените на Законот за работни односи, Законот за експропријација, Законот за градење и Законот за утврдување на јавен интерес и номинирање на стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10-д (делница на автопатот Прилеп– Битола) во Република Северна Македонија, сите по скратена постапка.
Владата на 5 мај усвои измени и дополнувања на петте закони поврзани со изградбата на коридорите и ги означи со европско знаменце, откако претходно опозициските пратеници ги блокираа законските измени што до Собранието ги предложи група пратеници од власта. Законите беа доставени во собранието без образложение за европското знаменце, односно за нивно усогласување со законодавството на ЕУ.
Делегацијата на Европската Унија во Скопје, но и лично евроамбасадорот Дејвид Гир во неколку наврати реагираа дека употребата на европското знаменце на законите поврзани со изградбата за коридорите не е во согласност со стандардите на Унијата.