Во реакцијата, опозициската партија оценува дека има поврзаност меѓу одлуката на Уставен да ја отфрли иницијативата за резолуцијата за мигрантите и изјавите на функционерите од власта дека на земјава ќе ѝ бидат потребни странски работници за одржување на моменталното ниво на Бруто-домашниот производ
Откако Уставниот суд ја отфрли иницијативата на СДСМ за оценување на уставноста на „Резолуцијата за осуда на манипулациите на опозицијата и за потврда на политиките против нелегалната миграција“, која на предлог на ВМРО-ДПМНЕ беше усвоена минатата година во Собранието, одлуката ја прокоментираа од СДСМ.
Во реакцијата, опозициската партија оценува дека има поврзаност меѓу одлуката на Уставен да ја отфрли иницијативата за резолуцијата за мигрантите и изјавите на функционерите од власта дека на земјава ќе ѝ бидат потребни странски работници за одржување на моменталното ниво на БДП.
„Александар Николоски најави 50 000 нови ‘економски работници’ годишно. Мицкоски ја дуплираше бројката, рече над 100 000, па дури направи им кажа на граѓаните или многудетни семејства или мигранти, односно ‘економски работници’. Два дена по најавата на Николовски и еден ден по најавата на Мицкоски гледаме одлука на Уставниот суд со која се отфрла иницијативата на СДСМ за неуставната Резолуција со која и се забранува на опозицијата да говори за мигранти, односно за ‘економски работници’“,
се вели во реакцијата на СДСМ.
Оттаму уште еднаш ја обвинија власта за политичко влијание врз правосудството и прашаа:
„Дали е потребно дополнително објаснување?“
Уставниот суд денеска ја отфрли иницијативата на СДСМ за оценување на уставноста на „Резолуцијата за осуда на манипулациите на опозицијата и за потврда на политиките против нелегалната миграција“, оценувајќи дека оспорената Резолуција не содржи правни норми што би можеле да бидат предмет на уставно-судска контрола, туку исклучиво декларации од политички карактер кои не уредуваат општествени односи.