Резолуцијата за осуда на манипулациите на опозицијата и за потврда на политиките против нелегалната миграција, која на предлог на ВМРО-ДПМНЕ беше донесена во Собранието во декември лани, се однесува на политичкиот спор за наводните договори за прифаќање мигранти и изградба на мигрантски кампови во земјава
Во образложението за отфрлањето на иницијативата на СДСМ за оценување на Резолуцијата, од Судот велат дека оспорената Резолуција не содржи правни норми што би можеле да бидат предмет на уставно-судска контрола, туку исклучиво декларации од политички карактер кои не уредуваат општествени односи
Уставниот суд ја отфрли иницијативата на СДСМ за оценување на уставноста на „Резолуцијата за осуда на манипулациите на опозицијата и за потврда на политиките против нелегалната миграција“, која на предлог на владејачката ВМРО-ДПМНЕ беше усвоена во Собранието во декември минатата година.
Резолуцијата, која беше донесена со 65 гласа „за“ и пет „против“ во македонскиот парламент, се однесува на политичкиот спор меѓу власта и опозицијата за наводните договори за прифаќање мигранти и изградба на мигрантски кампови во земјава. Во неа, власта ги осудува тврдењата на опозицијата за наводни договори за прифаќање мигранти и изградба на мигрантски кампови, отфрлајќи ги како лаги и дезинформации.
По усвојувањето, СДСМ ја оспори резолуцијата пред Уставниот суд, оценувајќи ја за неуставна.
Иницијативата се најде на дневен ред на денешната седница на Уставниот суд, на која беше и отфрлена.
Во образложението, од Судот велат дека иницијативата е отфрлена затоа што оспорената Резолуција не содржи правни норми што би можеле да бидат предмет на уставно-судска контрола, туку исклучиво декларации од политички карактер кои не уредуваат општествени односи. Според уставните судии, Резолуцијата не претставува акт што може да биде предмет на оценување на уставноста и законитоста. Поради тоа, Судот утврдил дека не е надлежен да одлучува по поднесената иницијатива, повикувајќи се на член 38 алинеја 1 од Актот на Уставниот суд.