СДСМ во соопштение до јавноста реагира на обвинувањата на ВМРО-ДПМНЕ дека власта ја злоупотребува вонредната состојба и дека потфрла во менаџирањето на кризата со епидемијата на коронавирусот.
Од СДСМ ја обвинија опозицијата дека наместо да понуди решенија – шири лажни вести со кои, како што велат, се поткопува здравствениот систем и се создава паника кај граѓаните.
„Ова се месеци кога сите надежи и очекувања на народот се насочени кон здравствените институции кои крајно одговорно и професионално ја извршуваат својата задача. Но, успесите и резултатите на јавното здравство очигледно му пречат на Мицкоски и затоа тој се промовираше со креатор на лажни вести со кои го заплашува населението“,
се вели во соопштението на СДСМ.
Од СДСМ тврдат дека се лажни обвинувањата за недостиг на тестови за ковид-19, исто како и проценките на опозицијата дека стотици илјади работници останале без работа. Според владејачката партија, целта на ВМРО-ДПМНЕ е да креира слика во јавноста дека владините мерки не функционираат.
„Никаде во светот, ниту една опозиција во време на пандемија не се однесува како што се однесува ВМРО-ДПМНЕ, ниту еден политичар од независноста до денес не се однесувал толку деструктивно кон својата држава и кон своите сограѓани како што тоа го прави Мицкоски по шемата на Никола Груевски“,
се вели во соопштението на СДСМ.