„Разликата е шокантна. Постоела понуда која е поевтина за 12 милиони евра, односно 78 563 евра поевтина по еден автобус. Власта свесно планирала да го оштети буџетот, за што писмено била предупредувана во неколку наврати, уште во ноември 2024 и во декември 2025 година“, рече Фрчковски
Тендерот за набавка на 150 нови автобуси за Скопје пропаднал бидејќи надлежните свесно туркале понуда која била поскапа за речиси 12 милиони евра, обвини денеска на прес-конференција Јон Фрчкоски, член на Извршниот одбор на СДСМ.
Според опозициската партија, преземањето на надлежностите од страна на Министерството за транспорт за набавка на автобусите немало за цел да му се помогне на градот, туку да се фаворизира унгарска фирма блиска до премиерот Виктор Орбан, преку елиминирање на другите понудувачи.
Фрчкоски презентираше официјална претставка поднесена до Министерството за транспорт, за која тврди дека докажува дека иако главниот критериум бил најниска цена, сепак се избирaл поскап понудувач.
„Разликата е шокантна. Постоела понуда која е поевтина за 12 милиони евра, односно 78 563 евра поевтина по еден автобус. Власта свесно планирала да го оштети буџетот, за што писмено била предупредувана во неколку наврати, уште во ноември 2024 и во декември 2025 година“,
изјави Фрчкоски.
Од СДСМ додаваат дека тендерот не е поништен поради загриженост за законитоста, туку затоа што одговорните биле „фатени на дело“.
Поради наводните нерегуларности, опозицијата рече дека случајот го презема американскиот адвокатски тим „The Ticktin Law Group“. Според Фрчкоски, оваа адвокатска група за случајот веќе најавила дека ќе ги извести Белата куќа, Стејт департментот и Американската амбасада во Скопје.
Од партијата соопштија дека јавниот превоз во Скопје останува во колапс токму поради ваквите пропаднати постапки и побараа итна реакција од надлежните институции.
„Ова не е само политички дебакл, ова е кривично дело. Институциите мора веднаш да отворат истрага за тоа кој се обиде да потроши 12 милиони евра повеќе пари на граѓаните и за ова мора да има одговорност“,
порача Фрчкоски.
Откако вчера, Државната комисија по жалби за јавни набавки донесе решение за поништување на тендерот за електрични автобуси и полначи, а на кој за најповолна беше избрана заедничката понуда на унгарската компанија „Електробус – Икарус“ и на австриска ЕВН, денеска со реакција се јавија и од политичката партија Левица.
Оттаму упатија критики до владејачката ВМРО-ДПМНЕ поради прекинувањето на јавната набавка за нови автобуси за потребите на главниот град. Од Левица велат дека поради личните каприци и пресметки со градоначалничката Данела Арсовска, советниците на ВМРО-ДПМНЕ во претходниот мандат намерно го блокирале Советот на Град Скопје, свесно саботирајќи ја набавката на возила што самите претходно ја ветуваа пред граѓаните.
Од Државната комисија по жалби за јавни набавки вчера рекоа дека одлуката е донесена по службена должност, а од Министерството за транспорт најавија дека согласно своите надлежности, предметната јавна набавка повторно ќе биде објавеба согласно законските прописи во најбрз можен рок.