Од владејачкиот СДСМ обвинуваат дека лидерот на опозициската ВМРО-ДПМНЕ Христијан Мицкоски е фокусиран само на одбрана на криминалот на екс-премиерот Никола Груевски. Затоа се обидувал да ги блокира реформите и да ѝ наштети на земјата преку неприфаќањето лидерска средба.
„Има забелешки за попис, а не сака да разговара. Мицкоски сака земјата да остане без попис 18 години, го следи криминалното крило на ВМРО-ДПМНЕ кое не сака земјава рамномерно да се развива. Во време кога функционира правосудниот систем во државата и имаме неселективна правда, кога сите се еднакви пред законите, Мицкоски бега од разговор за законот за јавно обвинителство“,
соопштија од СДСМ.
Додаваат дека иако Мицкоски бара предвремени избори, не сака да зборува за подобрување на изборниот законик.
„СДСМ нема да дозволи деструкциите и обидите за закочување на напредокот и реформите коишто ги прави Христијан Мицкоски и ВМРО-ДПМНЕ да успеат. Одбраната на криминалот на Никола Груевски нема да успее“,
порачуваат од СДСМ.
Од Владата веќе соопштија дека лидерската средба нема да се одржи зашто не бил постигнат консензус. Обвинија дека Мицкоски уценувал наметнувајќи го како тема одржувањето на предвремени парламентарни избори.